محمد هاني: الأهلي منظومة ناجحة.. واللاعبون الجدد كانوا محتاجين يدوقوا طعم البطولات
عبّر محمد هاني لاعب فريق الكرة الأول بالنادي الأهلي عن سعادته بـ التتويج بلقب كأس السوبر المصري 2025 على حساب نادي الزمالك في المباراة النهائية التي أقيمت على ملعب محمد بن زايد بدولة الإمارات.
تصريحات محمد هاني
وقال محمد هاني في تصريحات عبر قناة أبو ظبي الرياضية: الأهلي أكتر فريق كان محتاج البطولة لعدة أسباب، من ضمنهم لأن اللاعيبة اللي لسه جايين للفريق جديد محتاجين يدوقوا طعم البطولات في الأهلي، لأن في أنديتهم السابقة كانوا بيكسبوا بطولة كل 3 أو 4 سنين.
وأضاف: طبيعي الأهلي منظومة ناجحة، هتلاقي في ناس عاوزة تخرب وتوقع وهم مش عارفين يعملوا دا في الملعب لأن الأهلي كبير أوي.. في خطة وكله ماشي عليها، وعمر ما هتحقق كل البطولات دي صدفة.
وتابع: أي حد عاوز يخرب أو يوقع فرقة، أو في ناس معينة مدايقة من بعض الصفقات، النادي اجتهد وجابها لفريقنا وبيكسبونا ماتشات.
وأردف: همّا عاوزين يصدروا إن في مشكلة في أوضة اللبس.. أنا مش عاوز أحلف، بس مفيش أي مشاكل بينا ولا في حد بيبص لحد.
وأوضح: إحنا أكتر ناس في التتويج كنا فرحانين بـ زيزو وبنحاول نخليه يشيل الكأس وحتى حسين الشحات اللي في مركزه أكتر واحد فرحان له.
