حفيدة محمد فوزي ردًا على متسابق The Voice: مش معترضة على القرابة من بعيد.. ولكن ميقولش إنه حفيد الموسيقار الراحل
قالت هيدي نبيل حفيدة الفنان محمد فوزي إن صلة القرابة بينها وبين كريم الحو متسابق The voice غير مؤكدة، مؤكدة أن أحفاد محمد فوزي معروفون جيدًا ولم يستغلوا شهرة الراحل.
حفيدة محمد فوزي ردًا على متسابق The Voice: مش معترضة على القرابة من بعيد
وأضافت هيدي نبيل خلال تصريحاتها لـ القاهرة 24: محدش كان يعرف كريم غير لما طلع وقال إن جدي محمد فوزي ولما أحمد سعد قال له أنت حفيد محمد فوزي، في الأول ما منفاش ده، هو من صلة قرابة مش معروفة وبعتلي صورة بطاقته وكمان والدته تواصلت مع الناس في طنطا، بس اشمعنى دلوقتي بيقول إنه قريبنا ليه مظهرش من زمان.
وأضافت: أنا يشرفني إن الناس ترجع تجيب اسم جدي تاني، ولكن هو مش ابن عمي مباشر، مصر كلها دلوقتي بتقول إنه الحفيد المباشر لمحمد فوزي، ودي مش الحقيقة ممكن يكون قريبنا من بعيد.
واستكملت: الولد مؤدب ومحترم وصوته حلو، وأنا مش معترضة عليه بأي شكل من الأشكال، اعتراضي إن مصر بتقول إنه حفيد محمد فوزي، وهو مش حفيده، هو ممكن يتشهر بنفسه مش عشان حفيد محمد فوزي.
وتابعت: أحفاد محمد فوزي معروفين كويس جدًا، ولا عمرهم استغلوا الشهرة، ولا إحنا استخدمنا اسم جدنا علشان نتشهر ولا بنحب الناس تتكلم علينا من الأساس، إحنا 10 أحفاد من الدرجة الأولي، والعيلة كبيرة، بس عمر ما حد طلع وقال إنه حفيد محمد فوزي قبل كده.
