حفيدة محمد فوزي تكشف حقيقة قرابته لـ كريم الحو متسابق The Voice
كشفت حفيدة الموسيقار الراحل محمد فوزي، تفاصيل أزمة اسم الراحل بـ كريم الحو متسابق The voice، مؤكدة أن أحفاد محمد فوزي معروفون جيدًا ولم يستغلوا شهرة الراحل.
حفيدة محمد فوزي تكشف حقيقة قرابته لـ كريم الحو متسابق The Voice
وقالت خلال لايف عبر القاهرة 24: صحيت من النوم تفاجأت أن حفيد الموسيقار محمد فوزي يتصدر برنامج The Voice، ولجنة التحكيم معجبة بيه جدًا، أنا اتخضيت لأن مفيش حد من أحفاد الموسيقار محمد فوزي له أي علاقة بالغناء، ودخلت أشوف مين هذا الشخص لاقيت أن مفيش حد فينا يعرفه.
وأضافت: الموضوع كبر جدًا وبدأ يتكتب أول ظهور للحفيد الموسيقار محمد فوزي، الموسيقار له تاريخ معروف في كل الوطن العربي وخارجه، وعمر ما حد من أبنائه ولا أحفاده اتكلم، وعمر ما كان في حاجة فيها جدال على القرابة، إحنا مالناش في البروباجندا وحياتنا خاصة وسايبين تاريخ محمد فوزي هو اللي يتكلم عنه، وأي ظهور جديد وأي حاجة إحنا كعيلة إحنا مش طرف فيها ده مش مقبول.
وأوضحت: أنا مش ضد كريم ولكني ضد تداول أنه حفيد محمد فوزي، لأنه مش حفيده، وإن الاسم الأخيرة للعائلة يكون واحد ده لا يعني أن في قرابة أولى ولا خامسة، ممكن نعد قرابات بعيدة جدًا لدرجة أنه قال أن الأجداد ولاد عم، وده لا يجعله حفيدا للموسيقار محمد فوزي.
وأردفت: تخوفنا كعائلة من قرارات كريم اللي لسه في بداية حياته سواء هتبقى سليمة أو خاطئة هتفضل دايمًا مربوطة بـ اسم محمد فوزي، وده غير مقبول لكل العائلة من الدرجة الأولى اللي بتحمل اسم محمد فوزي، إحنا منعرفهوش ولا عمرنا سمعنا عنه.
وأكملت: كريم تواصل معايا وبعتلي صورة البطاقة، ولكن اسم الحو لا يعني القرابة من الدرجة الأولى، ولا يعني التصاق اسم الموسيقار العظيم بـ اسم حد بيبدأ مشوار حياته، أنا مش معترضة على كريم أنا معترضة على اللي حصل حول القصة كلها.
واختتمت: إحنا مش هنأذي كريم ولا عايزين نأذي حد، ولا هيكون في أي إساءة ورد شرف، إحنا مش عايزين الموضوع يكبر أكتر من كده، محمد فوزي عنده 10 أحفاد مباشرين، ومحدش فينا بيستخدم اسمه بصورة أو بـ أخرى.
