مواطن يزعم تعرضه للنصب عبر تطبيق فيزيتا: واحد نصاب عامل نفسه دكتور
اشتكى أحد المواطنين من تطبيق فيزيتا، بعد زعمه تعرضه لعملية نصب من شخص يدعي كونه طبيبا.
مواطن يزعم تعرضه للنصب في تطبيق فيزيتا
وقال المواطن خلال منشور له عبر فيسبوك: سقطة كبيرة من تطبيق فيزيتا مع واحد نصاب عامل نفسه دكتور، كنت تعبان شوية ورحت عملت تحاليل اشوف ايه التعب دا واطلع بيها على دكتور اكتشفت أن عندي سكر، قياسات التحليل كانت الصايم والفاطر فوق الـ 350، التراكمي كان: 10، الحمد لله دائما وأبدا
فتحت تطييق فيزيتا Vezeeta ودورت على دكتور قريب مني واخترت استشاري.
وتابع: الحكاية بالتفصيل: طلبت حجز بعدها بأقل من دقيقتين لقيت رقم بيرن عليا واحدة ست بتقولي أنت فين وجيلنا منين وجنبها صوت راجل بيقولها هاتيه هاتيه قولتلها أنا ماشي على عنوان تطبيق فيزيتا لقيت الراجل بيقولها قدام كذا ورا كذا (بيقولها العنوان لأنها مش عارفاه)، وبعتلي على الواتس اب اللوكيشن مكتوب أما وصلت للعنوان:
1 - مفيش أي بانر ولا يافطة بخط الإيد حتى
2 - العيادة مفيهاش رسيبشن هي أوضة بس ومش نضيفة وتخوف
3 - أما دخلتني للدكتور وأول ما اتكلم عرفت إنه الراجل اللي كان بيتكلم جنبها في الموبايل
وواصل: أما بدأت الكشف:
1- رفض يشوف التحاليل اللي معايا وقالي هنعمل تحاليل هنا
2 - رفض يسمع أي شكاوى عندي أصلا وقالي هنعالجك من أي حاجة مش محتاج تقول بتشتكي من إيه
3- طلعني على الشيزلونج وركب السماعة وقعد يلعب بيها وبعدين لقيته بيخلع السماعة وبيركبها للمساعدة بتاعته وبيقولها تعالي اسمعي.. بقوله هي دي دكتورة قالي لا دي مدرسة إنجليزي وبعلمها وعايز أعلمها عليك
4- قالي لازم تعمل سونار عندي هنا دلوقتي قولتله انا متعاقد مع تأمين وهعمله في مكان تاني قالي هعملهولك هنا ب٥٠٪ خصم قولتله إيه الفرق قالي الأجهزة هنا بتطلع الصورة كبيرة وواضحة غير أي مكان قولتله تمام هجيب جواب من الشغل عندي متوجه ليك قالي لا مش محتاج ادفع بس وصورة البطاقة أما أصريت قلب وشه وقالي أما تعمل التحاليل والأشعة عندي نبقى نشوف
5 - قولتله أنا تعبان فعلا محتاج تقولي فيه ايه تديني دوا فضل يغني ويعيد واما لاقني قفشت كتبلي روشتة ومقالش حتى فيها إيه
6- أخدت الروشتة وأنا طالع الست المريبة المساعدة بتاعته جات ورايا بقولها الراجل دا نصاب ومش دكتور قالتلي انت اول حد تشتكي قولتلها هو شغال في مستشفى ايه قالتلي كليوباترا مصر الجديدة... كلمتهم قالولي مفيش دكتور هنا بالاسم دا.
وأردف: أول ما نزلت لقيت الرسايل اتحذفت على الواتس وعملت فيه شكوى في فيزيتا، لقيته حذف الزيارة من التطبيق كأني ما روحتش بس الذكي نسي إنه كاتبلي روشته بايده، أما نزلت سألت عليه في الشارع الناس اللي يعرفوه وهم قليلين جدا قالولي إنهم مسمينه دكتور سواقين التكاتك (مع احترامي ليهم طبعا)، ليه بتقولوا كدة ؟ قالولي كان بيجمع السواقين ويعلقلهم محاليل ويقولهم دي مقويات علشان يعمل زحمة عنده في العيادة، وأما سرشت عليه بعدها لقيت اللي في الصور دا.
واختتم: تعديل: أنا مش من القاهرة ومعرفش دكاترة هنا وأما شوفت التحاليل وكلام دكتور المعمل والصيدلي اتخضيت جدا وفتحت فيزيتا ولقيته هو أقرب دكتور ليا للـسف وكنت رايح مش شايف قدامي من التعب والاجهاد، ولأني لقيته فيه فيزيتا ومكتوب أنه أستاذ دكتور ومتخصص، أنا لقيت تقييمات على فيزيتا دلوقتي للراجل النصاب دا.
