فتاة تستغيث من شركة نقل ذكي شهيرة: السائق وقف في حتة مقطوعة عشان ياخد فلوس زيادة وهددني
استغاثت فتاة في منشور لها عبر موقع التواصل الاجتماعي فيسبوك، من شركة نقل ذكي شهيرة، بعد تعرضها لواقعة تهديد وابتزاز من سائق الرحلة، مقابل تلقي أموال أكثر من المتفق عليها بالتطبيق وسعر الرحلة.
فتاة تستغيث من شركة نقل ذكي شهيرة
وقالت الفتاة في المنشور: كنت طالبة سائق من شركة النقل من كومباوند لـ بيتي المسافة تقريبا 20 دقيقة بالظبط وجالي الراجل السائق ماشي على سرعة أزيد من 100 كيلو طول الطريق ساكت مبيتكلمش جالو مكالمة في نص الطريق غالبًا كانت من بنت قبلي شتمها بأهلها وقالها: إنتي مش رحلتك خلصت متقرفنيش بقا وقفل في وشها.
وأضافت: المهم قربنا من بوابة الكومباوند وقلتله بعد إذنك أنا داخلة بوابة 1 ممكن تنزلني هنا وأنا هكمل لحد البيت مش مشكلة بس نزلني هنا مردش عليا وفضل مكمل لبعد البوابات كلها عمالة أعلي في صوتي وأخبطله في الإزاز وهو مبيردش والله العظيم قولت راجل عجوز وشكله عنده مشكلة ومش سامع، في الآخر لقيته ركن في حتة مقطوعة مرعبة بيقولي اللوكيشن هنا قلتله لوكيشن إيه أنا بقول لحضرتك نزلني بقالي ساعة ومبتردش.
وتابعت: لف برقلي وقالي لو عايزاني أرجعك عند البوابة يبقى هتزودي فلوس وصوته عالي أوي، أنا من الخضة كنت بترعش قلتله هديك اللي انت عايزه بس نزلني بعد اذنك فضل يزعق ويعلي في صوته ويقولي لو مش هتدفعي كاش وهتدفعي انستا باي يبقا تحولي كذا ويعلي في الفلوس أكتر، كل اللي كان فارقله ياخد فلوس أزيد وأنا مش فارقة معايا لو هياخد أضعاف بس يكون بني آدم محترم، فضل يقول يبقا تحولي دلوقتي كذا وأنا عمالة أقوله حاضر، وكان بيطلع حاجة من جيبه الله أعلم كان ناوي يعمل فيا إيه، لولا إني عرفت أفتح الباب وأنزل بالعافية، أنا متأكدة إنه كان ممكن يموتني أو يعمل فيا حاجة، والله العظيم متتخدعوش بالظاهر.
