الأوردر اتشحن من جنب جراج الأوبرا.. فتاة تحذر من أبلكيشن temu بعد تعرض صديقتها للنصب
نشرت فتاة تدعى ياسمين عبدالفتاح، منشورًا لها عبر حسابها بموقع التواصل الاجتماعي فيسبوك، تحذر فيه من أبلكيشن temu، مشيرة إلى أن صديقتها تعرضت للنصب بسبب طلب أونلاين حيث استلمت شحنة مزيفة.
قالت الفتاة: بالنسبة لأبلكيشن temu الجديد اللي أسعاره خطيرة وحاجاته حلوة جدًا، وبيعمل هدايا مميزة فعلًا لما بتلعب عليه spin، صديقة ليا طلبت منه أول أوردر، وقالولها إن هديتها مفيش جمارك هتدفعها.
فتاة تحذر من أبلكيشن temu بعد تعرض صديقتها للنصب
وأضافت: طلبت كريمات للشعر وبرفان وملابس، وتكلفة الأوردر كانت 2000 جنيه، ودفعتهم بالڤيزا لأن لازم عشان تطلب أوردر يكون الدفع أون لاين، ووصل الأوردر فعلًا وكلموها عشان الاستلام، وأول هدية بقا إنها لازم تدفع 3800 جنيه جمارك عشان تستلم، البنت اتخضت طبعًا، بس تمام هي قالت هتدفع وأمرها لله، والمندوب جالها فعلًا، واستلمت وبتفتح الصندوق لقت الملابس من الغورية، ولما سألتها عرفتي إزاي قالتلي إنها نزلت الغورية وشافتهم هناك فعلًا، والكريمات مضروبة، والبرفان زي اللي بيتباع في المترو، وبتحط مسك يطلع ميّة نار.
وتابعت: بعتتلهم إيميل تقولهم يا نصابين يا حرامية، قالولها سوري إنتي اللي مغفلة، وإحنا ملناش فرع في مصر أصلًا، وراحت كلمت المندوب قالتله أنت استلمت الشحنة منين؟، قالها من مكان في وسط البلد عند جراج الأوبرا، خدوا بالكم ياجماعة عشان دي نصباية محترمة، ويا ستات متجروش ورا الأسعار الرهيبة، واطلبوه من حد في السعودية أو الإمارات عشان هو شغال هناك.
