أمّن حياة الكلب ومأمّنش حياة بنته.. أول ظهور لـ ميار ضحية زوجها بالإمارات
كشفت ميار نبيل المعروفة إعلاميا بـ ضحية زوجها في الإمارات، أنها عادت إلى مصر مع ابنتها، موضحة تفاصيل ما جرى معها خلال فترة وجودها هناك.
أمّن حياة الكلب ومأمّنش حياة بنته.. أول ظهور لـ ميار ضحية زوجها بالإمارات
وقالت لـ القاهرة 24: أنا وصلت مصر وقاعدة في بيت والدي دلوقتي أنا وبنتي، كان استحالة أقعد أكتر من كدة.
وتابعت: أنا حصل معايا حاجات كتير كان منها إن في حد كلم أختي وقالها تعالي استلمي ورقة الطلاق من المحكمة، ولما راحت ملقيتش حاجة.
وأكملت: جوزي لغى عقد الشقة في الإمارات وكنت بلف للفجر وبنتي على إيدي أدوّر على سكن، كنت بنام في الضلمة على كشاف وهو كان بيعرف من البواب، كان مصمم نبات في الشارع أنا والبنت، فضلت أدور على مكان أبات فيه ونمت في مكان على حسابي الشخصي.
وعن موضوع الكلب أوضحت: الكلب ده كان معاه في الإمارات وهو واخده معاه مصر، مطلعله جواز سفر، ومأمّن له حياته، وساب بنته في الضلمة، عاوزة حقي أنا وبنتي.. وواثقة إن ربنا هيجيبلي حقي.
وفي وقت سابق، قالت أسرة ميار نبيل لـ القاهرة 24، إن الخلافات بينها وبين وزوجها مستمرة منذ نحو 6 أشهر، مضيفة أنها لم تتمكن من التواصل معه عندما كانت في مصر، فقررت السفر إلى الإمارات لاستكمال إجراءات قانونية ضده والمطالبة بحقوقها، مؤكدة أنه تعهد أمام المحكمة بتنفيذ مطالبها، لكنها فوجئت بإلغاء إقامتها وتركها دون أي وسيلة للعيش.
وتابعت: تم فصل كل المرافق عليها هي وابنتها لأن كافة المرافق مسجلة باسم الزوج.
وأوضحت: إحنا بنحاول نتواصل معاه أو نوصله، هو من العجمي بالإسكندرية ولما روحنا بيتهم هناك لقيناهم عزلوا وسابوه ومش عارفين نوصلهم خالص، هما شايفين الدنيا مقلوبة وبردوا مش عايزين يحلوا أو يساعدونا.
وأردفت: إحنا بناشد أي حد يقدر يساعدنا إحنا محتاجين نوصله علشان نحل مشكلة أختي اللي موجودة هناك لوحدها مع بنتها وتاخد حقها، إحنا قبل ما تسافر حاولنا نحل معاهم هنا في مصر قالولنا عندكوا المحاكم وهو في الإمارات وموفقوش يحلوا معانا.
