حساباته قربت تتقفل.. حملة لإنقاذ يونس مريض ضمور العضلات بـ 100 جنيه تتصدر السوشيال ميديا
استغاثت عائلة الصغير يونس مريض ضمور العضلات، لجمع تبرعات الجرعة الثانية من علاجه مع اقتراب إغلاق حسابات الصغير التابعة لوزارة التضامن الاجتماعي في شهر ديسمبر المقبل، وحتى الآن لم تجمع الأسرة إلا جزءا بسيطا من تكاليف الجرعة الأولى فقط، لذا أطلقت حملة “ادعم يونس مريض ضمور العضلات بـ 100 ج”.
عائلة الصغير يونس تستغيث لعلاجه من ضمور العضلات
وقال والد يونس في تصريحات خاصة لـ القاهرة 24: باقي على تبرعات علاج يونس 5 ملايين جنيه، عشان نقدر نشتري الحقنة العلاجية للجرعة الثانية، الحمد لله كملنا تكاليف علاج الجرعة الأولى، بس باقي كده جرعتين للعلاج.
وأضاف: المشكلة الأكبر اللي بنواجهها حاليًا نقص التبرعات أو عدم اكتمالها، بالإضافة لـ حسابات يونس التابعة لوزارة التضامن هتتقفل في شهر 12، لأن عدى عليها 24 شهر ودي المدة المخصصة من الوزارة نفسها لكل حساب فيهم، عشان كده إحنا الفترة دي أطلقنا حملة اسمها ادعم يونس بـ 100 ج عشان نلحق نعالجه ونجمع التبرعات لعلاجه
وأضاف: يونس أصغر حد في إخواته وهو الأمل الوحيد لينا وسندهم لأنهم مصابين بنفس المرض لكن خلاص وقت علاجهم انتهى والاتنين مش قادرين على الحركة، هو سندهم وبيعملهم كل حاجة، وبنتمنى من ربنا تكاليف علاجه تكمل وياخد الجرعات عشان يبقى سند اخواته ويفضل واقف على رجله ويروح مدرسته ويعيش حياته بشكل طبيعي.
