محمد صادق: بحب أشجع المواهب الشابة.. والجيل الجديد ممكن يكن أحسن مننا
أعرب المؤلف محمد صادق، عن سعادته الكبيرة بعضويته في لجنة تحكيم مهرجان الجامعة الأمريكية، موضحًا أنه حريص على دعم المواهب الشابة في تحقيق أحلامها الفنية سواء في السينما أو الدراما.
وقال محمد صادق، في لقائه مع القاهرة 24: دايمًا باحب أشجع المواهب الشابة وأبقى في ضهرهم على قد ما أقدر، ومستني أشوف أفلام حلوة، وبشوف دايمًا أن أي حاجة فيها إبداع لازم البني آدم يكون حقيقي، وطول ما أنت حقيقي وبتنقل اللي أنت شايفه والحاجة اللي الناس حباها الناس هتفضل تتفرج عليك أي كان سنها، وأتمنى أن الشباب الجديد يكونوا فاهمين ده لأنهم جايين من فئة مختلفة وممكن يكونوا أحسن مننا فلازم يظهروا ويكونوا قد ده.
محمد صادق يعلق على جرأة الألفاظ في هيبتا 2
وعلق المؤلف محمد صادق، على انتقادات جرأة الألفاظ في فيلم هيبتا 2 (المناظرة الأخيرة)، موضحًا أن الجرأة ما هي إلا وجهة نظر من شخص لآخر، قائلًا: كل واحد من حقه يقول رأيه والواحد بيحاول يبقى حقيقي على قد ما يقدر، في ناس ممكن متبقاش دي حياتها فهي شايفة إن مش طبيعي يسمعوا حاجة زي كده، وفي ناس تانية شايفة إنهم بيسمعوا ده كل يوم، فموضوع الجرأة ده وجهة نظر وكل واحد حر يقول اللي هو عايزه وينتقد والكاتب من حقه يكتب اللي هو شايفه ومحدش فيهم ييجي على حد، مفيش مشكلة نختلف ولكن الفكرة في أسلوب الاختلاف ونطور من نفسنا ونعمل اللي يرضي الناس.
