جدو يا طيب يا أبو عصاية
• ليه كل حاجة طعمها ألذ في بيت الجدة؟.. ليه الثقة في رأي الجد بتبقى أكبر من لو اتقالت من أب أو أم؟.. ليه حالة السكينة اللي بتتحس وأنت بتتكلم مع جدك وجدتك؟.
في سنة 2020 وفي واحدة من القصص اللي كان لها الصدارة في أكتر من موقع إخباري صيني ثم بعد كده صدى عالمي في معظم دول العالم عرفنا قصة المواطن الصيني السيد "وانغ".
راجل بسيط كان عنده وقتها 80 سنة، وكان أب لـ 3 أولاد وجد لـ 11 حفيد.. نشأته كانت بسيطة لأب وأم ظروفهم المادية في أقل أحوالها لكن رغم كده قدر يشتغل ويتجوز ويفتح بيت.. يمكن بس الحاجة الوحيدة اللي وقعت منه هى إنه ما أخدش حظه من التعليم.
بصراحة هو كان شايفها حاجة مالهاش لزمة ولا قيمة مادام كده كده بشتغل بدراعي وأكيد الشهادة مش هتزودني!.. لما كبر في السن نسبيًا وتحديدًا في سنة 2014 كانت صحته بدأت تخذله ومابقاش عنده قدرة على الشغل!.
أولاده طلبوا منه إنه يرتاح وهما هيتكفلوا بيه وكفاية عليه شغل بقاله أكتر من 65 سنة من وهو طفل!.. وافق.. موافقته كان من نتيجتها إنه بسبب القعدة في البيت قرب أكتر من أحفاده.. قرب بالذات من حفيدته البنت الوحيدة من ضمن 11 حفيد.. "آن".. بنوتة عسل كان عندها 8 سنين!.. كانت أقرب أحفاده له، وأكترهم حنية، والوحيدة اللي مايحلاش ضحكه وهزاره إلا معاها!.
ورغم إن باقي الأحفاد كلهم اتعلموا بناءًا على رغبة أبهاتهم لكن للأسف "آن" ورثت من جدها رفضه للتعليم!.. مع إن سنها صغير، وممكن الضغط عليها وإجبارها من والدها ووالدتها بس البنت ماتعرفش جابت الراس الناشفة دي منين!.. تعليم لأ يعني لأ.. ولما كانت المناقشة معاها بتوصل لحيطة سد كانت تقول بما معناه "إشمعنى جدي".. أنتم مش شايفينه راجل عظيم ومكافح؟.. طب ما هو مش متعلم، وده ماقللش من نظرتكم الموقرة له!.. فكانت لما تقول كده أفراد أسرتها يسكتوا!.
الابن الأكبر لـ "وانغ" مات، وبسبب موته صحة الراجل بدأت تتدهور!.. مشاكل في الكلى، أزمات قلبية، قرحة معدة، خشونة الركبة، وغيرها من الأمراض اللي جت ورا بعض بشكل متتالي كإن وفاة الإبن كانت ضربة البداية لظهورهم!.. زاد قُرب البنت من جدها لما حست إن أيامه في الدنيا لو مشي بنفس المعدل هتبقى معدودة، وده أثر في نفسيتها جدًا خصوصًا إنه أقرب شخص ليها في البيت!.. بدأ هو كمان يشوف في عينيها خوفها عليه ورغبتها إنها تراعيه وتشوف كل طلباته بدون ملل!.
سألها "وانغ" في مرة على غفلة: (أعلم أنه أمر بالنسبة لكِ سخيف ومكرر لكن ما رأيك أن تبدأي مشوارك مع التعليم؟).. "آن" ملامحها اتقلبت وكانت هتشخط زى عادتها بس مسكت نفسها لما أخدت بالها إن "وانغ" اللي بيسأل!.. ردت إن اللي هى مهتمة بيه حاليًا هي صحته وإنه يبقى كويس فقط لا غير، وإن ده كفاية جدًا عليها!.. سألها: (إن طلبت من صغيرتي "آن" طلب هل ستنفذه؟).. ردت: (كل طلباتك ستنفذ بإستثناء أمر واحد تعلمه).. طمنها وقال لها متخافيش ده مشوار كده عايز أروحه بس مش هقدر لوحدي.
البنت وافقت وأساسًا هو مش محتاج يستأذن بس هل صحته هتساعده!.. خرجوا الصبح تاني يوم، وفوجئت بيه وهى سانداه إنه رايح يقدم لنفسه في المدرسة عشان يبدأ يتعلم ويمحو أميته!.. إيه ده!.. بالظبط كده.. دفع المصاريف، وسأل عن جدول الحصص، وسجل اسمه، وأخد الكارنيه كمان.. طبعًا "آن" اتكهربت والموقف فاجئها!.. من الأسبوع اللي بعده مباشرة بدأ "وانغ" يلتزم بالحضور اليومي في المدرسة مع عيال أصغر من أحفاده في الفصل!.. كل يوم الصبح كانت "آن" بتوصله للمدرسة على مضض، وبترجع تاخده في نهاية اليوم.. واحدة واحدة وبعد ما مر كام يوم طلب منها بشكل واضح إنها تيجي معاه.. ليه يا جدي؟.. عشان بحتاج أدخل الحمام أثناء اليوم، وبتكسف أطلب ده من حد غريب.
"آن" وافقت فورًا.. بقت تروح معاه يوميًا.. الفكرة بقى إنه ماوقفش لحد هنا.. لأ.. بعد ما يروحوا البيت كان يسألها عن الدروس اللي اتقالت في الفصل النهاردة.. هو أنت نسيت يا جدي؟.. آه ما أنا عشان كبرت في السن بقيت بنسى.. تمام إحنا أخدنا كذا كذا كذا.. طب أنا عايزك تركزي معايا بنسبة 100% كل يوم عشان لو حاجة وقعت مني.. تمام.
مرت الشهور ورا بعض، وبدأت "آن" تحب التعليم والمدرسة بعد ما كانوا مجرد أداء واجب.. على فكرة "وانغ" كمان كان بيتعلم ومركز جدًا.. ليه القصة انتشرت؟.. لإن في آخر يوم من أيام سنة 2019 تم إعلان إن "وانغ" أخد شهادة بتثبت إنه اجتاز 3 مراحل تعليمية كاملة في وقت قياسي رغم سنه الكبير، وده كان حدث مهم ومش بيتكرر كتير!.. حفيدته "آن" برضه كملت طريقها في التعليم بفضل جدها اللي كان السبب الأساسي في إنه يغير وجهة نظرها النهاردة، وحياتها بكره وبعده.
• فيه جملة مدهشة بتقول: (الأجداد خٌلقوا من أجل المحبة وإصلاح الأشياء).. محظوظ اللي شبع في صغره بوجود جده أو جدته في حياته.. هما التعريف الحقيقي لكلمة "البركة"، وصمام الأمان في أى بيت، ودليل على وجود غزارة محبة، حنية، صبر، ضحك، ودروس في الحياة مالهاش آخر.. الأجداد ودانهم بتسمع بجد، دراعاتهم بتحضن بجد، حبهم مش بينتهي، وقلوبهم من دهب.
