جيهان قمري: اتصنفت نجمة إغراء بعد فيلم عمارة يعقوبيان.. وحاسة بالذنب من بعد وفاة والدي
كشفت الفنانة جيهان قمري، عن تفاصيل وفاة والدها، معربة عن اشتياقها الكبير له، موضحة أنها دخلت في حالة من الإكتئاب عقب وفاته كانت السبب الرئيسي في غيابها فترة عن الساحة الفنية، بجانب حديثها عن تصنيفها كنجمة إغراء.
وقالت جيهان قمري، في لقائها بـ برنامج كلام الناس: بعدت لأن جالي إكتئاب فترة وبعدين والدي تعب وتوفى فخدت فترة علشان أطلع من الإكتئاب وكنت بسافر، وكنت حاسة بالذنب بعد وفاة بابا، وأنا قعدت معاه في المستشفى طول فترة تعبه، والدكتور كان شايف أنه خلاص ولازم نمضي إقرار على دواء معين وماما رفضت، وأنا شفت تعبه ورحت مضيت الإقرار ولما إدوله الجرعة حصله حالة وبعدها بيومين توفى، فحسيت أن أنا اللي سرعت موته، وكل يوم وأنا بنام بشوف المشهد ده، ووفاته هزتني جامد.
وأضافت: سافرت أوروبا وبقيت أمشي في الشوارع مع نفسي علشان أخرج من الحالة، وقعدت أسبوع مش عارفة أنا بعمل إيه وبعيد حساباتي في الدنيا.
جيهان قمري: اتصنفت نجمة إغراء.. ويقولوا اللي يقولوه
كما علقت جيهان قمري، على تصنيفها كنجمة إغراء، قائلة: اتصنفت نجمة إغراء بعد فيلم عمارة يعقوبيان، ومفيش حاجة دلوقتي اسمها كده والإغراء بيكون بطريقة معينة ودلع زيادة ودي حاجة فيا، فيقولوا اللي يقولوه.
