خبطت في الأرض بالعصاية من زهقي.. المسن الصعيدي صاحب واقعة المترو بعد بلاغه ضد الفتاة: غلطت فيا وشتمتني
كشف الحاج عبد العال محمود عبدالعال المسن الصعيدي، صاحب فيديو المترو، سبب تقدمه ببلاغ ضد الفتاة في الواقعة.
المسن الصعيدي صاحب تريند المترو بعد تقدمه ببلاغ ضد الفتاة: غلطت فيا وشتمتني
وقال لـ القاهرة 24: عملت محضر في البنت عشان قلة أدبها عليا وغلطها فيا، وبسبب الكلام اللي قالته عني، والنيابة هتحقق في الواقعة، وأنا هستمر في اتخاذ الإجراءات القانوينة ضدها.
وأضاف: أنا عملت محضر في البنت بسبب السب والبهدلة اللي بهدلتهالي، دي قالتلي همسح بيك بلاط المترو، أنا ظهرت في فيديو المترو وأنا بزعقلها من الزهق والغيظ، وخبطت في الأرض بالعصاية من زهقي، لكن مكنش قصدي أخوفها.
وتصدر مقطع فيديو المسن الصعيدي داخل مترو الأنفاق، تريند منصات التواصل الاجتماعي الأيام الماضية، حيث تضمن مشادة بينه وبين فتاة شابة على خلفية اعتراضه على طريقة جلوسها بوضع قدم فوق الأخرى أمامه.
وقال في تصريحات سابقة لـ القاهرة 24، البنت كانت قاعدة قدامنا في المترو وحاطة رجليها في وشنا، قُلتلها عيب بالذوق لو سمحتي نزلي رجلك عشان في ناس كبيرة في السن قاعدة قدامك، غلطت فيا رديت عليها، قلت لها إنتي ما اتربتيش.
