عمرو مصطفى: عندي فرط حركة واشتغلت في النجف.. وخلصت إنتاج مصر الموسيقي لمدة 10 سنين بـ كوردين فقط
حل الفنان والملحن عمرو مصطفى، ضيفًا على الإعلامي معتز الدمرداش، في برنامجه ضيفي، وتحدث خلال اللقاء عن تصالحه مع الهضبة عمرو دياب، وتفاصيل مشواره الفني، وحياته الشخصية وعمله في درب البرابرة قبل الفن وعائلته وزوجته.
أبرز تصريحات عمرو مصطفى مع معتز الدمرداش:-
- بعد أزمتي الصحية شفت الحياة بـ فلسفة مختلفة، بصيت لـ أنا ليه أتخانق وليه أزعل من حد وليه أتنرفز؟
- بصيت أن عمرو مصطفى أكيد ربنا إداله الموهبة علشان هدف في الحياة، المفروض أننا كفنانين ننشر الخير والحب والسلام.
- من كتر حبي في عمرو دياب، حصل اللي حصل، أنا اكتشفت ده بعد ما تعبت واكتشفت أني بحبه أوي، هو أخويا ولما كتبلي بوست خلاص كل الزعل راح ولا كأن حاجة حصلت، وهو لما بيغني كأن أنا بغني لأني عايز أغني.
- عمرو دياب كلمني قبل ما يكتبلي بوست وهزرنا، وأنا اديته كل حياتي وأغانيا كلها وأحلى حاجة بتطلع على طول كان عمرو بياخدها.
- من أول 2011 دخلت موسيقى المهرجانات، قعدت مع نفسي وقلت مش هلحن ولازم أعرف السر، عايز أعرف الناس بترقص ليه.
- الفترة اللي وقفت فيها تلحين دي عملت أغنية العمر ملامحه بتتغير لـ شيرين عبد الوهاب، وأغنية علشان أوقات بعدها دايبيين، وأغنية طبعًا قادرين نعملها، وأغنية برج الحوت ويتعلموا لـ عمرو دياب.
- أنا مرفضتش المهرجانات أنا حللت، واللي استفدته أن أوعى ترفض حاجة الناس بتعجبها، لكن حللها، وكانت الرحلة بتاعتي في التحليل علشان أفهم ليه بيتحركوا وبتأثر فيهم وبترقصهم، ولما عملت بشرة خير كانت عن علم مش صدفة.
- الفترة اللي جاية هيكون عندي أكاديمية كبيرة فيها كل الموسيقيين، هنعمل إعلانات وموسيقى تصويرية وحفلات، بأسسه أن يكون عندنا كيان كبير أوي للموسيقى في الشرق الأوسط، الحاجات دي لازم نسيبها للأجيال اللي جاية.
- أغنية بقت عادة لمحمد حماقي، من ألحاني وكانت في العشرة الأوائل في إسبانيا وكانت تريند 2025، وملقتش أسمي مكتوب على الأغنية، فكلمت ابني عبد الله ووقف الأغنية على اليوتيوب.
- شركة سوني كلمتني وقلتلهم إزاي متكتبوش الاسم؟، كتبوا اسمي وخدت 50% من أرباح اليوتيوب بتاع الأغنية، وكل ده حصل بالصدفة، ولو كان عدى علينا وقت كان هيقولوا إن عمرو مصطفى اللي واخد اللحن.
- الغرب بياخدوا كل الجُمل اللحنية بتاعتي وبيعملوها، وساعات بيعملوها بموسيقى أحلى من اللي إحنا عاملينا، ولكن أنا دلوقتي كل حاجة مسجلة في صاسام (جمعية المؤلفين والملحنين)، وبيبقى عندي حقوق.
- أنا مش دارس موسيقى، ومعرفش الـ سلم الموسيقي ولا النوتات ولا المقامات الموسيقية ولا الهوا، اللي بيشغلني مشاعري، واللي يعرف تشغله مشاعره يوريني، وأنا مبسوط ومش عايز أتعلم، واللي يعرف يعمل زيي يعمل.
- اشتريت جيتار والسيديهات بتاعت جيبسى كينغز، واتعلمت كوردين، وعملت أغاني بعترف وماله والعالم الله لعمرو دياب، وأنا مش متعلم غير كوردين بس، وقعدت عليهم وخلصت إنتاج مصر الموسيقي لمدة 10 سنين، وبعدها قولت لنفسى لازم أغير، وحفظت كورديت تانيين.
- عندي ADHD فرط حركة ونقص انتباه، ومبعرفش أحفظ من الورق ولا أركز، وكنت بحفظ دروسي بطريقة الأغاني.
- اشتغلت من وأنا عندي 12 في النجف وكنت بصنعه في درب البرابرة، ومسكت فلوس من وأنا صغير، علشان كده لما دخلت الوسط الفني كان الألفين جنيه بتوع أغنية خليك فاكرني ولا حاجة لأني مسكت 100 ألف.
- التجار في درب البرابرة كانوا بيدعوا أنهم يشوفوا أولادهم زيي لأني كنت شاطر وأنا في 3 إعدادي وأنا اللي ماسك السوق، ولما عملت فلوس كتير أوي أهملت الدراسة، ولما السوق الشغل قل فيه رجعت أركز في الدراسة تاني.
- أنا وعمرو دياب من أول ما دخلنا المزيكا ناقر ونقير، ولما بقوله يمين من قلبي والله ويعمل هو حاجة تانية، هو دماغه كده، ومعظم الموزعين اللي اتعانوا مع عمرو دياب كنت أنا سبب في وجودهم مع عمرو دياب.
- أنا أصغر واحد في إخواتي، وكنت متحمل المسؤولية من وأنا صغير وكنت تاجر شاطر في النجف في درب البرابرة.
- مراتي لازم يتعملها تمثال، وأنا هعملها تمثال في البيت الجديد، لأن هي دي بعد أمي الله يرحمها هي اللي شكلت عمرو مصطفى واللي كانت بتوقفني، دي كل حياتي معاها.
- أول ما شفتها قلتلها هتجوزك وبعد أسبوعين كان الفرح، كانت جدعة أوي ولما رحت أطلب إيديها قعدت مع خالها لأن والدها متوفي، ودفعت المهر لـ خالها وأنا ماشي رجعتهولي وعرفت من وقتها أن دي مراتي.
- في أغنية عاملة للكينج محمد منير اسمها دروس العمر، دي بتحكي قصة حياتي، الأغنية هتنزل قريب من كلمات تامر حسين، وأعتقد أنها قصة حياة عمرو مصطفى.
