بمناسبة العام الجديد.. محمد أنور: آسف لأي حد ظلمته أو مضايق مني.. وبتمنى حسن الختام
وجه الفنان محمد أنور، رسالة لجمهوره بمناسبة رأس السنة 2026، موضحًا أن أمنية حسن الخاتمة، وهي الأمنية التي تتكرر معه كل عام.
وقال محمد أنور، في مقطع فيديو نشره عبر حسابه بموقع إنستجرام: مع بداية كل سنة جديدة بنعمل قائمة بالأمنيات اللي نفسنا تتحقق في خلال السنة، وفي نفس الوقت بنطلع قائمة الأمنيات بتاعة السنة القديمة علشان نشوف إيه اللي اتحقق منها وإيه اللي متحققش علشان نضمها للسنة الجديدة.
وتابع: دايمًا في أمنيات بتتكرر معانا كل سنة، أظن أن دي الأمنيات اللي أهم في حياة البني آدم، لأن الأمنيات اللي بتتغير كل سنة بناءً على احتياجاتك في السنة دي أمنيات دنياوية وخاصة بأحلامك في الدنيا.
وأضاف: أنا لما جيت أشوف قائمة الأمنيات بتاعتي في آخر كام سنة، لاقيت أن في أمنية كل سنة بتتكرر معايا اللي هي اللهم أني أسألك رضاك والجنة، طول السنة بعمل حاجات كتير غلط وممكن أكون برتكب ذنوب، ولكني مع بداية كل سنة بتمنى الأمنية دي.
واستكمل: في أمنية تانية ليها علاقتك بالبشر، أنت بتتمنى ربنا يرضى عنك وتدخل الجنة، ده مش هيتحقق لو أنت ظلمت إنسان أو عليك دين لـ بني آدم، لازم الدين ده يتسد والمظلمة ترد، وأنا عامل الفيديو علشان أقول أسف لأي حد ظلمته سواء عن قصد أو بدون قصد، أي حد زعلان مني أو فهمني غلط سامحني إحنا بني آدمين والوحد بيتعلم وبينضج وبيقرب من الموت أكتر وبيتمنى حسن الخاتمة.
واختتم: عايز أقول لأي حد زعلني أو ضايقني أو شتمني أو حتى بيكرهني، أنا مسامحك ودايمًا بلتمس العذر ودايمًا بجيب الغلط عندي وبأنب نفسي، أنا مش شيخ ومش عارف أنا عامل الفيديو ده ليه ولكني حاسس أنه هيوصل أسرع وأصدق من المنشور المكتوب.. أعذرولي أي خطأ وسامحوني الدنيا مش مستاهلة.
