خنقتها بالطرحة وقمت صليت.. ننشر أقوال المتهمة بإنهاء حياة شقيقتها الصغرى خلال نومها في البدرشين
كشفت التحقيقات في واقعة مقتل فتاة على يد شقيقتها عن طريق تطويق عنقها بقطعة قماشية داخل غرفة نومها في البدرشين، تفاصيل الواقعة.
أقوال المتهمة بإنهاء حياة شقيقتها الصغرى خلال نومها في البدرشين
وحصل القاهرة 24 على نص التحقيقات في الواقعة، حيث جاءت أقوال المتهمة أمام جهات التحقيق كالآتي:
ما هي تفصيلات اقرارك: اللي حصل إن أنا واختي عائشة أخوات وعايشين مع بعض في نفس البيت وأنا كنت بكلم ولد جارنا في نفس سني كنت بكلمه عشان إحنا معجبين ببعض وكان مستني يخلص تعليمه ويتقدملي ولما أهلي عرفوا إني بكلم الشاب ده حصله مشكلة جامدة جدًا والموضوع بعد كده هدي.
وأضافت المتهمة: بعدها أنا رجعت أكلمه والموضوع اتعرف تاني على أول شهر 10 كده وحصلت مشاكل وأنا فضلت برضه أكلمه بس من ورا أهلي ومن حوالي شهرين كده أختي عائشة سمعتني وأنا بكلمه ومن ساعتها كل ما تحصل بينا مشكلة تقولي هقول لبابا وماما أنك بتكلميه وأنا ساعتها بسكت، لحد ما في يوم كانت نازلة الشارع فبقولها جبيلي معاكي حاجة قالتلي لا مش هجيبلك حاجة، فقولتلها ليه طيب ده إنتي نازلة الشارع برضه مرضيتش وشدينا مع بعض في الكلام لحد ما قالتلي لو مسكتيش هقول إنك بتكلمي جارنا.
وأكملت المتهمة: وأنا ساعتها سكت والخناقة دي كانت على الساعة 8:00 كده وهي نزلت ورجعت ولما جينا وقت النوم على الساعة 1:00 بليل قعدت أفكر هي كل مرة هتهددني بالموضوع ده والشيطان لعب في دماغي وقررت إني أقتلها ولما أتأكدت إنها نايمة أخدت الطرحة كانت محطوطة فوق مخدة وطلعت فوقيها ولفيت الطرحة حوالين رقبتها وفضلت أشدها لحد ما قطعة النفس والطرحة أخدتها خبيتها في أوضه ثانية وأنا قعدت نايمة شوية.
وواصلت المتهمة: بعدها طلعت بره صلیت وفضلت قاعدة برة لحد ما أبويا قالي خدي أختك الصغيرة نيميها جوه ولما أخدتها ودخلت عملت نفسي متفاجئة أن عائشة مبتردش وناديت عليهم واتفاجأوا باللي حصل وطلبنا الإسعاف محدش رد وأبويا أخدها وطلع على المستشفى وبعدها بساعة ولا اثنين لقيت الشرطة جاتلنا البيت ورئيس المباحث قعد معايا لوحدي وقالي إيه اللي حصل فقومت قولت كل حاجة عملتها وساعتها أخدوني على المركز وبعدها على النيابة وهو ده كل اللي حصل.
