قالتلي بيخنقني وحاطط السلاح على رقبتي.. ننشر أقوال والد دينا علاء ضحية زوجها في التحقيقات| انفراد
ينفرد القاهرة 24 بنشر التحقيقات في قضية مقتل دينا علاء لاعبة الجودو على يد زوجها، والتي حوت شهادة والدها وطبيعة علاقة ابنته بزوجها، وكواليس المكالمة الأخيرة بينهما، وكيف تلقى خبر مقتلها.
أقوال والد دينا علاء ضحية زوجها في التحقيقات
واستمعت جهات التحقيق لأقوال علاء الدين السيد، والد دينا علاء المجني عليها وجاءت كالآتي:
س / ما صلتك بكل من / دينا علاء الدين السيد السيد، شریف علام محمد حسني؟
ج / دينا بنتي وشريف زوج بنتي.
س / ما طبيعة العلاقة تحديدا بينك وبين المدعو شريف علاء محمد حسني؟
ج / زوج بنتي وعلاقتي بيه كويسة جدا.
س / ما معلوماتك بشأن الواقعة محل التحقيق؟
ج / اللي حصل إن أنا كنت في إجازة بالغردقة انا ووالدة دينا وبعدها جالي تليفون من عمرو ابني وبيكلمني وبيسألني هي دينا كلمتك ولا لا قولتله لا وهو معايا على التليفون لقيت دينا بتكلم مامتها على الماسنجير مكالمة صوتية قولتله خليك معايا ولقيت دينا بتقول الحقوني شريف رافع عليا المسدس وبتقول عايز يضربني بالنار وقولتلها ادهولي وفي نفس اللحظة قولت لعمرو يأخد أخوه ويروح يلحق أخته بسرعة علشان شريف رافع السلاح على أختك وكلمت شريف أنا ومامتها وقعدنا نقوله اهدى يا شريف مالك وبتحاول تهدي فيه وفي نفس الوقت بتابع مع ولادي عمرو ووليد لغايت ما يوصلوا ليها.
وأضاف والد دينا في التحقيقات: وبعدين الخط فصل مع دينا ورجعت تتكلم تاني عالطول ولقيت آسر ابن بنتي بيقولي الحق يا جدو بابا ضرب ماما بالنار وضرب نفسه بعدها وكلمت عمرو بسرعة لقيته بيقولي شريف ضرب دينا بالنار وضرب نفسه وواقعين على الأرض ميتين وركبت العربية وطلعت أجري بسرعة على البيت ووصلت لقيت دينا بنتي ماتت وشريف في المستشفى وهو ده كل اللي حصل.
س / متى تحديدا نما إلى علمك حدوث الواقعة ؟
ج / يوم الجمعة ١٥-٨-٢٠٢٥ حوالي الساعة ٣:٤٢ مساء
س/ وما هي كيفية اتصال علمك بالواقعة ؟
ج / أنا جالي اتصال هاتفي من تليفون بنتي دينا
س / وما تفاصيل تلقيك نبأ تلك الواقعة ؟
ج أنا جالي اتصال تليفونى من بنتي دينا على تليفون مامتها ورديت عليها لقتها بتقولي الحقوني شريف رافع السلاح عليا وبعدين حاولنا نتكلم مع شريف علشان تبديه وبعدين الخط فصل وبعدها بدقتين رنت تاني وقالتلي الحقني ده بيخنقني وبعدين الخط فصل وبعدها عالطول لقيت تليفونها بيرن وآسر ابنها هو اللي بيرد عليا وبيقولي بابا ضرب ماما وضرب نفسه بالنار.
س / وهل تحدثت مع المدعو شريف علاء آنذاك ؟
ج / أيوة
س / وما مضمون الحوار الذي دار بينكما آنذاك ؟
ج / إحنا كنا عاملين نقوله في إيه وفهمنا وهو مكنش بيرد كل اللي بيقوله أو كأنه واحد بيستهزأ من كلامنا أو مش فارق معاه
س / وهل تحدث ثمة عبارات آنذاك ؟
ج / هو متكلمش هو كل اللي قاله ماشي بطريقة واحد بيستهزء وغير مبالي بكلامنا بس مقلش جملة ولا كلمة واحدة.
س / وما مضمون العبارات التي قالتها دينا آنذاك ؟
ج اول ما كلمتنا قالت لنا الحقوني شريف رافع عليها السلاح وعايز يموتني وهي مخضوضة والاتصال التاني لقتها بتقولي الحقوني ده بيخنقني وحاطت السلاح على رقبتي
س / وما مضمون العبارات التي أخبرك به آسر نجل نجلتك تحديدا؟
ج / لقيته بيقولنا الحقوا بابا ضرب ماما وضرب نفسه بالنار وييعيط والمكالمة فصلت معرفش إزاي
س وما المدة التي استغرقها الاعتداء منذ لحظة تلقيك الاتصال الهاتفي ؟
ج حوالي تلت ساعة
س / وما التصرف الذي بدر منك حال تلقيك ذلك الاتصال ؟
ج / أنا ساعة ما كلمتني كلمت ابني عمرو وبلغته ان هو يروح بسرعة هو وأخوه وليد على بيت أخته بسرعة وكنت متابع مع عمرو لحد ما تأكدت من الخبر ورجعت عالطول على إسكندرية
س / وما هي آخر مرة شاهدت فيها كلا من ابنتك المتوفاة إلىرحمة مولاها دينا والمدعو / شريف ؟
ج / يوم ما سافرت ٩-٨-٢٠٢٥ حوالي الساعة ١١ مساء
س/ وما الحالة التي كان عليها آنذاك ؟
ج / كانوا كويسين ومفيش أي مشاكل.
س / وهل شاهدت ثمة سلوك غير طبيعي علي المدعو / شريف آنذاك ؟
ج / لا الراجل كان طبيعي جدا وكان عايز يوصلنا للباص والمفروض إن هو كان هيجي ورايا هو ودينا علشان يقضوا الأجازة معانا.
س / ومنذ متى وسالف الذكر متزوج من ابنتك؟
ج / منذ حوالي عشرة سنوات
س / وهل صدر خلال تلك المدة ثمة أي سلوك عدواني اتجاه ابنتك؟
ج لا خالص هو كان هادي جدا
س / وهل حدثت بينهما ثمة خلافات خلال فترة زواجهما ؟
ج/ لا
س وهل سبق وأن اشتكى المدعو شريف من ثمة ضغوطات بسبب الأعباء الأسرية؟
ج لا
س / وهل سبق وأن شكى من تصرفات نجليه آدم وآسر ؟
ج ا لا دول ولاده هاديين وعمره ما اشتكى منهم
س / وهل وقفت على كيفية حدوث وفاة نجلتك دينا علاء الدين السيد السيد ؟
ج / ايوة
س / وما هي كيفية حدوث وفاة نجلتك تحديدا ؟
ج / أنا اللي عرفته إن شريف ضرب بنتي بالنار
س / وكيف وقفت على ذلك ؟
ج / من خلال الاتصال الهاتفي اللي جالي من آسر ابنها واللي عرفني عمرو ابني لما وصل
س وهل تشتبه جنائيا في وفاة نجلتك ؟
ج / أيوة
س / ومن تتهم تحديدا في وفاتها ؟
ج / أنا بتهم / شريف علاء محمد
س / وما قصده من ارتكاب الواقعة ؟
ج هو قصده يقتلها.
س / وكيف وقفت على ذلك القصد ؟
ج علشان هو ده اللي حصل.
س/ هل لديك أقوال أخرى ؟
ج/ لا.
