مع رضوى الشربيني.. فتاة التجمع في أول ظهور بعد حبس سائق أوبر المتهم بخطفها: اتنصفت وحقي رجع
كشفت نبيلة عوض، المعروفة إعلاميًا بـ فتاة التجمع، عن تفاصيل تعرضها لمحاولة خطف وهتك عرض على يد سائق أوبر، والذي تم تأييد حبسه 15 سنة.
وقالت نبيلة عوض، في أول ظهور لها مع الإعلامية رضوى الشربيني، في برنامجها هي وبس: أنا من سنة ونص طلبت عربية والسواق جه وخدني وفي نص الطريق وقف وقال عايز يشرب مياه من شنطة العربية، وإتأخر وقلبي اتقبض وفتح الباب وخلاص، حاولت على قد ما أقدر وهربت من العربية.
وعن تفاصيل إنقاذها، فأوضحت نبيلة عوض: في عربية نقل هما بعد ربنا، هما اللي وقفوا لما شافوا الموقف ورجعوا بضهرهم، والسواق جري وساب العربية مفتوحة، كل اللي أنا فاكراه أني كنت في حالة هستيرية وهما غطوني بـ بطانية، ووقفوا عربية وقالوا له يودوني المستشفى لأنهم مش هينفع يرجعوا.
وأضافت: رفعت قضية وحقي رجع، وكسبت القضية من أول جلسة وأخد حكم 15 سنة، وحسيت أني اتنصفت ومكنش ينفع تتأخر أكتر من كده، وحاسة إني اتراضيت، الواحد بيسمع أن القصص دي بتحصل والبنات بتسكت، أنا حقي رجع فورًا والدنيا منامتش.
