عمري ما كنت بغني.. ليجي سي: كنت بحب اسمع أغاني ولكن عمري ما تخيلت إن هيجي وقت أبقى قاعد في استوديو وأسجل أغنية
تحدث الرابر ليجي سي، عن بداياته الفنية موضحًا أنه لم يكن ينوي الدخول بالوسط الفني، بجانب الكشف عن سر اختياره لـ اسمه الفني.
وقال ليجي سي، في لقائه مع الفنانة والإعلامية إسعاد يونس، في برنامجها صاحبة السعادة: ليجي سي حسيت إن الاسم بيعبر عني، اللي اختار ليا الاسم من أصدقائي المقربين جدًا اقترح عليا وقلت هعمل اللي أنت عايزه ومعنديش مشكلة.
وعن بدايته الفنية، فأوضح ليجي سي: عمري ما كنت بغني، كنت بحب اسمع أغاني ولكن عمري ما تخيلت إن أنا هيجي عليا وقت أبقى قاعد في استوديو وأسجل أغنية، ده بالنسبة ليا كان حلمًا.
وتابع: بدأت من كورال المدرسة في 2009، كنت بـ دندن وراهم وخلاص وقعدت فترة كده، ومن بعد كده قلت إني مش حاسس ده ولكن في حاجة عايز أعملها ومش عارف هي إيه، حاولت أكتب أغاني وأنا مبعرفش اكتب حتى موضوع تعبير ومكنتش بكتبه في الامتحان، ولكن بعرف اكتب اللي جوايا، ومش عارف أتعلم مزيكا، ومفيش أي حاجة حواليا بتقولي إني ممكن اعمل حاجة، وبدأت أتعلم إزاياعمل مزيكا لـ نفسي.
وأضاف: اللي حواليا كانوا بيخوفوني ويقولولي الموضوع محتاج عازفين وستوديو وشوف هتصرف قد إيه، وأنا كنت لسه داخل أولى ثانوي، فالموضوع مكنش منطقي وبدأت أفهم أكتر وقعدت علمت نفسي لغاية ما أتحطيت على فكرة إني ممكن اعمل ده كله وأنا قاعد في البيت وأخدت دروس على اليوتيوب، الموضوع أخد مني وقت لأن مكنش فيه حد بيوجهني.
