قاتلة زوجها عريس المرج: متجوزين عن حب ودي كانت ساعة شيطان | خاص
حصل القاهرة 24 على نص التحقيقات في قضية مقتل شاب بالمرج بمحافظة القاهرة، على يد زوجته بعد خلافهما على تحضير الطعام، بأن تلقى منها طعنة أودت بحياته في الحال.
اعترافات قاتلة زوجها في المرج
واستمع رجال التحقيق بالقاهرة، إلى أقوال زوجة المرج المتهمة بقتل زوجها، وجاءت كالآتي:
اسمي هبة عبد الحليم عندي 21 سنة، وأنا ربة منزل.
س: ماذا حدث وما هي ظروف ضبطك وعرضك علينا؟
ج: أنا كنت قاعدة في البيت وبعدين أحمد جوزي رجع من الشغل وقاللي فين الأكل، قولتله بحضره ليك لقيته فضل يزعق فيا ويشتمني أنا وأهلي واضايقت وقولتله يبطل علشان ما اشتمش أهله أنا كمان، لقيته جالي المطبخ وأنا بجهز الأكل ومد إيده عليا وزقني، وفضلت أزعق وأبعد إيده عني وفضلنا نعافر أنا وهو، وهو مسك إيدي اليمين ولفها ورا ضهري وكانت إيدي فيها السكينة لأني كنت بقطع الأكل بيها وبعدين وهو بيرجع لورا لقيته وقع على الأرض ولقيت في دم على السكينة فرميتها بسرعة.
وواصلت زوجة المرج في التحقيقات: أنا افتكرت إنه اتعور منها بالغلط وجيت أقومه لقيته بينزل دم وأنا خوفت عليه وكنت خايفة ومش عارفة أعمل إيه وبسرعة نديت على شيماء أخته وقولتلها إلحقيني بسرعة، وبعد كده شيلناه وطلعنا بيه على المستشفى وكان هو مات ساعتها، ولما الشرطة جت قولت للظابط على اللي حصل كله.
س: هل هناك خلافات بينك وبين المتوفى؟
ج: لأ خالص واحنا متجوزين عن حب ودي كانت ساعة شيطان واللي حصل ده كله كان من غير قصد.
س: متى وأين حدث ذلك؟
ج الكلام ده حصل بتاريخ 30 ديسمبر اللي فات الساعة 8:30 مساءً بالمرج.
س: من كان برفقتك آنذاك؟
ج: كان معايا أحمد زوجي وبعد كده أخته شيماء طلعت الشقة بعد ما ندهت عليها.
س: ما هي بادرة لقائك بالمجني عليه آنذاك؟
ج: هو رجع ليا البيت بعد ما خلص شغل على التوكتوك.
س: ما هي الحالة التي كان عليها؟
ج: هو كان راجع من الشغل زي أى راجل بييجي من الشغل بيكون مش في أحسن حال وتعبان شوية.
س: ما هو سبب تعدي المتوفى عليكي؟
ج: بسبب إنه لما روح البيت ما لقاش الأكل جاهز بسبب إني كنت تعبانة بسبب الحمل.
س: ما كيفية تعديه عليكي؟
ج: لما ملقاش الأكل فضل يشتمني ويشتم أهلي وأنا رديت عليه وقولتله ما تغلطش في أهلي عشان في أهلك إنت كمان لقيته اتعصب وجه عليا المطبخ وفضل يشتم فيا ومسك إيدي اليمين ولفها وقعد يضريني في ظهري.
س: ما هو عدد الضربات التي كالها لكي؟
ج: خبطني بأيده أربع خبطات في ظهري.
س: أين استقرت تلك الضربات تحديدا؟
ج: في ظهري وكان ماسك إيدي اليمين ولوحها.
س: هل كان المجني عليه حاملا لأدوات أو أسلحة حال التعدي عليكي؟
ج: هو كان بيضربني بإیده بس.
