ومن كوالدي!

* ليه كل واحد فينا بيشوف والده أفضل، وأطيب أب في الدنيا!.. يعني معنى كده إن كل الأبهات مثاليين!.. أومال النماذج القاسية اللي بنسمع عنها من وقت للتاني والحوادث اللي بيكون أبطالها أبهات معدومين الضمير جُم منين!.. أو على وجه الدقة موجودين فين لما كل أبهاتنا محترمين وبنضرب بيهم المثل!.

أستاذ الطب النفسي د."غيل سالتز" قال في واحد من مقالاته واللي كان بعنوان "أبي وآباءهم": (حتى مع وجود بعض الآباء السيئون لكن أبناءهم ودون شك يصبحون آباءًا في قمة اللُطف والإنسانية بسبب ما عانوه في صغرهم).. يعني النسبة الأكبر، والأغلب من الأبهات بيكونوا طيبين وحتى لو فيه أب سيء غالبًا أولاده هيطلعوا عكسه مش زيه عشان مايبقوش نسخة مكررة من أب كانوا كارهين وجوده!.

 في الباب المخصص للقصص الإنسانية فى جريدة (نيويورك تايمز ) المواطن الأمريكى "دان كلارك" بيحكى عن قصة حصلت معاه هو ووالده "كلارك" فـى ولاية (أوهايو ) من أكتر من 30 سنة ومقدرش ينساها.. والده كان واعده هو وأخته بـزيارة للسيرك كـمكافأة ليهم لتفوقهم الدراسى فى آخر أسبوع.. خدهم وراحوا ووقفوا فى طابور حجز التذاكر قبل مدخل خيمة السيرك.. واقف هو وأبوه وأخته.

كانوا رقم 2 فـى الطابور وقبلهم فيه أسرة تانية بسيطة واقفة بتحجز مكونة من أب وأم و8 أطفال !.. شكلهم مش أغنياء ولبسهم مش غالى بس نضيف.. الأب والأم ماسكين إيد بعضهم فـى أول الصف وحواليهم على جنب العيال ماسكين إيد بعض إثنين إثنين وعمالين بيتكلموا عن البلياتشو والأفيال والحاجات اللى نفسهم يشوفوها جوه اليوم ده.. "دان" بيقول إنه كان ملاحظ ورغم سنه الصغير وقتها قد إيه إن كان باين إن اليوم ده مميز جدًا فى حياة الأسرة البسيطة دى وخصوصًا الأطفال.

أبو العيال وصل لـ شباك التذاكر وطلب من الموظفة 10 تذاكر إتنين للكبار و8 للأطفال.. الراجل بمجرد ما سمع الرقم اللى اتقال ساب إيد مراته وملامحه إرتبكت ووطى على الموظفة وسألها تانى وشفايفه بترتعش: كم قلتِ ؟.. الموظفة كررت الرقم تانى.. "دان" بيقول ورغم إنه كان واقف وراهم كان شايف الموقف بتفاصيله وفجأة بص على يمينه ولقى والده "كلارك" اللى كان بيراقب الموقف من الأول زيه بالظبط دخل إيده فى جيبه وخرج منها 20 دولار ووقعها على الأرض وزاحها لـ قدام شوية بـرجله وبعدها راح نده على الأب اللى واقف عند الشباك وقال له وهو بيوطى يجيب الفلوس: (معذرة يا سيدى لقد سقطت منك هذه النقود).

الأب فهم وبص فى عين "كلارك" والد "دان" ومسك إيده خد منها الفلوس وضغط بكف إيده التانية على إيده جامد وهز راسه بمنتهى الود وعينه بتشكره.. "دان" وقتها وزى العيال قعد يرفص هو وأخته مـن الغيظ لأن المبلغ ده عمل عجز فـى ميزانيتهم هما وبص لـ أبوه اللى قال لهم بمرح: (ما رأيكم لو أجلنا زيارة السيرك للأسبوع القادم، ولنذهب إلى المنزل اليوم وسأتولى مهمة قلى البطاطس وإختيار فيلم فيديو نسهر عليه؟).. "دان" بيقول: (شعر أبى بمعاناة هذا الأب وساعده دون أن يهتم أن يوضح لنا لما فعل هذا، أبى عظيم وهذا الموقف علمنى أنا أيضًا كيف أكون أب عظيم).

*  "حسن" شاب مصري كتب على منصة إكس تويتة فيها موقف حصل بينه وبين والده فبيقول: وأنا طفل أبويا إتزنق فى فلوس، وكان عندنا تليفزيون كبير كده فقرر يبيعه.. الناس اللى هتشتريه جت عشان تاخده فدخل عليا الوضة لقاني قاعد فى ركن وبعيط.. سألني: مالك.. قولتله: مش هشوف كابتن ماجد تاني.. طلع أبويا للناس وقالهم: معلش يا جماعة مش هينفع والله.. ومابعهوش!.. موقف تاني كتبه الشاب السعودي "نائل" على منصة إكس برضه حكى فيه إنه كان لما بيطلب من أمه فلوس قبل ما يخرج مع أصحابه بتقول له: (خُذ من جيب أبوك).. تمام وإيه الغريب فى كده ما هو ده بيحصل حتى عندنا فى مصر!.

"نائل" بيقول: (على فكرة ابوي الله يرحمه متوفي من ٨ سنوات وأمى محتفظه بآخر ثوب له وكل الفلوس تحطها فيه عشان ماينقطع حسه بالبيت، والله من ٨ سنوات تقول لنا خذوا من جيب أبوك).. وعشن كده ماكنش غريب إن الشاب المصري د."ميسرة" إبن الدكتور "يحيي الأحمدي" كتب عن جملة كان دايمًا والده الله يرحمه يقولها ليه: (أنا لما أموت هتسمع عن اللى ساب لعياله مليون وإتنين، واللى سابلهم عمارات وأراضي.. ساعتها ماتزعلش.. أنا كنت فى الوقت اللى هما كانوا بيجيبوا فيه الفلوس دي كنت بأربي 11 ولد وبنت لو حطتهم فوق بعض ووقفت عليهم هاطول حتة من السما بإيدي).

* تفاصيل بسيطة بس مهمة بتحصل معاك أو مع غيرك هي اللي بتثبت لك من وقت للتاني إن أى شخص ممكن يخلف.. لكن مش أى حد ينفع يكون أب.. كم القصص اللى بتتسمع أو بتتشاف من قريبين بتقدر تعرف من خلالها صعوبة مهمة الأبوة دي، وإن موضوع المسئولية مش سهل.. الخوف من الخلفة خوف ملوش مبرر من شيل المسئولية.

حتى لو حظك كان وحش فى تربية سوية سليمة فلسه عندك فرصة تصلح ده مع ولادك وتخليهم يشوفوا فيك النموذج الحلو اللى ماكنش ليك نصيب وحظ تقابله من أهلك.. الأب الكويس مش بيموت أبدًا.. بيفضل عايش بكامل حضوره في ولاده، في تصرفاتهم، في كلامهم، وفي إحساسهم.. معظم الطيبين طيبين عشان أبهاتهم كانوا طيبين.. الأب الكويس لا بيتنسي، ولا بيموت، وبيفضل مكمل في ذاكرة ولاده على طول.