المكنة قطعت إيدي.. فتاة تستغيث بعد إصابة عمل داخل سوبر ماركت شهير بأكتوبر: بتر شبه كلي وعايزة حقي
نشرت فتاة تعمل في مجال التسويق، منشورًا لها عبر حسابها الشخصي بموقع التواصل الاجتماعي فيسبوك، تستغيث فيه بعد تعرضها لإصابة عمل بسوبر ماركت شهير بمدينة 6 أكتوبر، حيث تعرضت لإصابة خطيرة في اليد أدت إلى بتر شبه كلي في كف اليد.
وقالت سلمى الشعراوي الفتاة التي تعرضت لقطع في كف اليد، في منشور لها عبر حسابها بموقع فيسبوك، أنا عمري ما كنت حابة أطلع أكتب الكلام ده، بس اللي حصل معايا لو سكت عنه أبقى بظلم نفسي وبظلم أي حد ممكن يتحط في نفس الموقف، يوم 30/8/2025 كنت رايحة شغلي كمنسقة تبع شركة محترمة جدًا، ومش هذكر اسمها لأنها واقفة جنبي من أول لحظة واتكفلت بكل عملياتي وعلاجي لحد دلوقتي ولسة متابعة معايا.
فتاة تستغيث بعد تعرضها لإصابة عمل داخل سوبر ماركت شهير بأكتوبر
وتابعت سلمى الشعراوي: يومها كنت موجودة في سوبر ماركت بنده فرع أكتوبر، وشغلي كان تسويق منتجات للشركة اللي أنا تابعه ليها، مش شغل شيفات بس اللي حصل اتفرض علينا نشتغل شغلهم تقطيع جبن زي الرومي والفلامنك وغيره، شغل خطر ومش شغل بنات ومش من اختصاصنا، وده شغل الشيفات في السوبر ماركت وده معروف في المجال كله، الماكينات في القسم كلها مكانش عليها أي أمان، وده بشهادة كل اللي شغالين، وأنا كنت لسه جديدة في الشغل، والمكن كان بيكهرب قبلها بكتير، واتقال لهم أكتر من مرة، ومحدش اهتم، واتقال لنا بالنص أنا والبنات اللي شغاله معايا: بطلوا دلع واشتغلوا.
وأضافت: فجأة الماكينة اللي أنا شغالة عليها اشتغلت لوحدها، وسحبت إيدي وانا بقطع المنتجات الخاصه بيهم هما ك سوبر ماركت مش تبع شغلي، وكف إيدي اتقطع، صريخ، دم، والناس واقفة تتفرج، زومحدش دخل ينقذني غير عميل كان بيشتري حاجات دخل بسرعة وشال الفيشة، وكل اللي عملوه حاولوا يطلعوا إيدي من الماكينة وطلبوا الإسعاف، حتى عربية الإسعاف خدوا حقها أول ما وصلت المستشفى.
وتابعت: فتاة تعرضت لإصابة عمل خطيرة داخل سوبر ماركت شهير، كانوا باعتين معايا موظف أمن، ومحدش من المسؤولين جيه معايا، وموظف الأمن خد مني الموبايل ومكنش راضي يخليني أكلم حد من أهلي، لحد ما بنت كانت معايا اتخانقت معاه وخدت الموبايل وكلمت أهلي يجولي المستشفى، ولما أمي وصلت المستشفى وكانت عايزة تعمل محضر عشان الإصابة خطيرة، بتر شبه كلي لكف اليد، موظف الأمن فضل يتحايل عليها وقالها متعمليش محضر، هنروح في داهية لو عملتي محضر، وبعد الحادثة بفترة، حد من الاستاف بتاعهم كلمني وقال لي نصًا: لو رفعتي قضية وكملتي فيها هتبقي غلطانة واحنا عندنا مستشار قاوني.
واستكملت الفتاة: أنا عندي 20 سنة ولسه في تالتة جامعة، وكل اللي عايزاه حقي وما يحصلش مع حد غيري اللي حصل معايا، لحد النهارده أنا عاملة 20 عملية في إيدي عشان ترجع كويسة، ولما كلمتهم بعد اللي حصل الرد كان صادم: إنتي ملكيش حق عندنا وملناش دعوة، لا زيارة، ولا سؤال، ولا مسؤول واحد اتحرك، وهددوا شيف قسم الجبن اللي كان موجود وقت الحادثة إنه لو اتكلم هيشيل هو الموضوع ويتحبس، والموضوع كله متسجل قانونيًا في مكتب العمل، ومعايا كل الإثباتات والتقارير الطبية، ونسبة العجز مثبتة، أنا مش طالبة غير حقي.
