عواد: لا أستحق هذه المعاملة من الزمالك.. وأحد أعضاء الإدارة البيضاء تحدث معي بأسلوب غير لائق
تحدث محمد عواد، حارس مرمى نادي الزمالك عن أزمته الحالية مع النادي، وغيابه عن المشاركة مع الفريق في المباريات خلال الفترة الأخيرة.
وفي تصريحات نقلتها قناة أون سبورت قال عواد: أنا لا أستحق هذه المعاملة من نادي الزمالك، أكن كل الاحترام والتقدير لكابتن حسين لبيب، هو الشخص الوحيد اللي بيتعامل بمنتهى الرقي والاحترام معايا ومقدرني ومقدر اللي أنا عملته جوه نادي الزمالك.
وأضاف عواد في تصريحاته: أنا واحد من اللاعيبة اللي جابت دوري وجابت بطولات لنادي الزمالك، أنا واحد من اللاعيبة اللي عمري ما افتعلت مشكلة وعمري ما عملت مشكلة، بالعكس أنا بتعامل زي أي حد، أنا لا أستحق إن واحد من أعضاء مجلس الإدارة يكون في اجتماع معايا ويرفع صوته عليا أو يتكلم معايا بأسلوب غير لائق.. لو النادي مش عايزني خلاص.
واستكمل عواد تصريحاته: أنا في بداية الموسم كان في عرض من المصري أُجبرت إن أنا أتحرك وأوافق عليه، أنا ما رضيتش عشان قلت الملعب هو الفيصل وأنا حابب أكون موجود في الزمالك، مع إني كنت هاخد فلوس كويسة جدًا في المصري، بس المصري نادي كبير وكل حاجة بس أنا قلت أنا عايز أقعد في الزمالك، عايز أكمل مشواري في الزمالك، عايز أختم مشواري جوه الزمالك وأساهم مع لاعيبتي ومع فرقتي إن أنا أجيب بطولات ثانية.
واستطرد حارس الزمالك: قلت الملعب هو الفيصل وهو الحكم، ما اشترطتش أي حاجة غير إن الملعب هو اللي يحكم.. بالرغم من ده اتعاملت معاملة سيئة، محدش بيديني اهتمام، ما حدش بيديني تقدير بشكل لا أستحقه أنا عمري ما عملت مشكلة، أنا واحد من اللاعيبة الكبار جوه الفرقة.
وأردف عواد: طلبت إن أنا أخرج في يناير، قلت عشان الفريق يستفيد والنادي يستفيد من الفلوس اللي هتيجي ورايا، أنا خلاص باقي في عقدي سنة وشوية، سنة ونص، طلبت حتى لو معرفناش نعمل ده في يناير، خلاص في الانتقالات الصيفية الجاية لو أنتم مش عايزيني خلاص أنا همشي وما فيش أي مشكلة والنادي يستفيد مني، مع إن أنا ممكن في يناير القادم أستنى وخلاص وأمضي لأي نادي والفلوس تبقى ليّ كلها لوحدي.
واستكمل حارس الزمالك حديثه: بس أنا مقدر جدًا جمهور الزمالك، مقدر جدًا نادي الزمالك اللي ليه دَين في رقبتي إنه واحد من أهم أسباب شهرة محمد عواد وقيمة محمد عواد، وأنا لغاية آخر لحظة أنا عايز أبقى في النادي وعايز أساهم بمجهودي إن أنا أجيب بطولات للنادي، لأن أنا بعشق جمهور الزمالك وبعشق نادي الزمالك عشان كده تحملت حاجات كثيرة جدًا لا يتحملها بشر.
وواصل عواد: أنا كان حلمي أكون موجود في كأس العالم، ولكن بالمنظر اللي أنا شايفه ده، الحلم ده حد بشكل مقصود بقى أو مش مقصود هيخليني ما أحققوش.. استحالة كابتن حسام حسن ولا كابتن إبراهيم حسن يفكروا فيّ وأنا ما بلعبش، ولا كابتن سعفان يفكروا فيّ وأنا ما بلعبش، مع إن أنا كنت واحد من الخيارات دايما اللي هما بيبصوا عليها طول ما كانت رجلي في الملعب.
واختتم عواد تصريحاته قائلا: أنا مش عارف أنا عملت إيه عشان يجرى معايا ده كله، مش عارف عملت إيه عشان أبقى بدفع إن أنا أمشي من نادي الزمالك اللي أنا بحبه وبعشقه وبعشق جماهيره.
