نهب فلوسي.. سيدة تزعم تعرضها للسرقة من طليقها والاعتداء عليها وابنتها
نشرت سيدة تدعى سماء القاضي، بوست عبر حسابها الشخصي على موقع التواصل الاجتماعي فيسبوك، زعمت خلاله محاولة تعدي طليقها عليها وتهديدها والضرب والقتل، وإلقاء ماء نار عليها وعلى أفراد أسرتها.
وقالت سماء القاضي، في منشورها: ده طليقي وأمه، اتطلقت منه وحياة بنتي ما خدت منه جنيه، واكل حقي وورثي من أبويا خده مني بحجة الظروف، مكنش بيسيب ليا جنيه، حتى نقطة بنتي من أهلي خدها مني، لا رجعلي الفلوس اللى سلفتهاله ولا حقوقي، ومع ذلك ساكتة وقلت حقي عند ربنا وبدعي كل يوم يصرف أضعافهم على مرضه، بيتعاطى المخدرات، وسهرات في كباريهات وعندي الأدلة بعلاقات نسائية كتيرة.
وتابعت: رفعت قضية واتطلقت منه الحمدلله، واتعرض ليا أنا وبنتي في الشارع ضربنا زي ما موجود في الصور، والبنت وشها متغرق دم زي ما هو باين، وعملت محضر بالواقعة، وبقى يقولي محدش يقدر عليا، ومبيصرفش على بنتي جنيه، ويحول الحوالة ياخد سكرين شوت ويعمل Refund، وأمي عشان ست أصيلة فضلت توريه بنته، ومعانا الدليل لحد ما بعت ڤويس بيشتمها ويشتمني ويخوض في عرضنا، عشان أمي طلبت يقدملها في مدرسة وماما فاض بيها عملتله بلوك.
وأضافت: لحد آخر يوم كان فيه في مصر إجازته اللى فاتت شهر سبتمبر 2025، بنته كانت معاه ومعايا صورهم سوا يبقى إزاي سنتين مشافش بنته يا ناس ولا حتى 10 شهور، اترفع رؤية لأمه وأول جلسة بتاريخ 30 يناير 2026، ويوم الجمعة اللي فاتت رحت اتعاملت بكل أدب أمه عشان متفضلش تشتم، عشان الرؤية متتلغيش كلمته فيديو كول وتعدي عليا أنا وأمي بالسب والقذف، وسكتنا وقلنا عند ربنا، ويوم الجمعة كانت تاني جلسة رؤية، البنت سخنة وتعبانة مقدرناش ننزل بيها جه شارب ومعاه أمه لحد باب بيت والدي، وشتمنا بابشع الشتايم وخاض في عرضي وعرض أمي وإخواتي، وهددنا إنه هيرمي على وشي مياه نار، وتهديد بالخطف والقتل، وتهديد بتأجير ستات يضربوني أنا ووالدتي علقة موت، وتهديد من أمه إنهم هييجوا كل يوم تحت بيتي وواضحة في الفيديو، وتهديد إنه هياخد بنتي خاج البلاد، ومش هشوفها تاني وباين في الفيديو عشان بعت أمه بيتي، وأنا على ذمته سرقت الباسبور الأمريكي بتاع البنت، وأنا مركزتش إن الغدر في دمهم من بدري.
واستكملت: أنا معنديش إخوات ولاد ووالدي متوفى، بقى يقولي معندكيش حد يقفلي، ومحدش يقدر عليا، أنا دلوقتي مهددة أنا وأمي وإخواتي، ومش عارفين نتحرك من البيت، حتى شغلي مش عارفة أنزله أنا عايزة حد يلحقني من البني آدم ده.
