ضحية نهى الدكر خلال تحقيقات الاتجار بالبشر: كنت باشتغل معاها عشان أصرف على أهلي

أصدرت محكمة جنايات القاهرة، الدائرة السابعة جنوب، حكمًا حضوريًا بمعاقبة المتهمة نهى رؤوف ميشيل إسكندر، المعروفة إعلاميًا بـ نهى الدكر، بالسجن لمدة 3 سنوات، وتغريمها 100 ألف جنيه، مع مصادرة المضبوطات، وإلزامها بالمصاريف الجنائية، في القضية رقم 13366 لسنة 2023 جنايات الهرم، والمقيدة برقم 3564 لسنة 2023 كلي أكتوبر.

ضحية نهى الدكر خلال تحقيقات الإتجار بالبشر

وحصل القاهرة 24 على نص تحقيقات المتهمة نهي الدكر، فى قضية الاتجار فى البشر، والصادر بها حكم بحبس المتهمة 3 سنوات وتغريمها 100 ألف جنيه  مع مصادرة المضبوطات.

وجاءت أقوال ضحية نهي الدكر فى قضية الاتجار فى البشر كالتالي:

س: ما هي ظروف نشأتك الاجتماعية ؟
ج: أنا اتولدت في محافظة المنيا ولما وعيت على الدنيا كنت عايشة مع أبويا وأمي وأخويا أصغر مني وأختي أكبر مني، وأنا دخلت مدرسة وأنا دلوقتي في ثانية ثانوي تجاري، وأبويا وأمي كانوا بيشحتوا فى الشارع، وأنا عندي 12سنة أبويا مات، وأنا وأمي وأختي جينا على القاهرة وأجرنا شقة في العمرانية وأخويا سافر يشتغل في الإسكندرية، وأمي بتدور تشحت وتجیب رزقنا وأنا بردو كنت بنزل أبيع ورد ساعات.
س وأين يوجد والدك ووالدتك؟
ج: انا أبويا متوفى، وأمي قاعدة في العمرانية هي وأختي في الشقة اللي مأجرينها.
س وأين تقطنين أنت تحديدًا ؟
ج: اذا عايشة مع أمي وأختي في الشقة اللي قلت عليها.
س: كيف تحصلين علي قوت يومك؟
ج: أنا كنت باشتغل في كافيه في الهرم بيعمل قهوة وكده، وبعد كده اتعرفت علي واحدة صحبتي هناك وقالت لي تعالي نسهر في مكان وروحت معاها مرة، وبعد كده عرفت أنه لو دخلت بس أقعد شوية علي ترابيزة جوه المحل  وآخد٤٠٠ او ٥٠٠ جنيه، وفعلًا بقيت أروح وبقيت أعمل فلوس كويسة من الموضوع ده وأصرف على أمي وأختي وإيجار الشقة اللي إحنا قاعدين فيها.
س:ما هي ظروف معيشتك الاجتماعية والمادية؟ 
ج: ما اتجوزتش قبل كده، وأنا عندي أنا وأمي وأختي وأخويا، وعايشة مع أمي وأختي بس، وحالتنا المادية صعبة يعني أمي بتشحت في الشارع وبتجيب رزقها، وأنا كنت ببيع مناديل في الشارع وبعد كده بقيت أشتغل في  المحلات كده، أنزل أقعد علي الترابيزات وآخد فلوس في آخر اليوم، وبقيت أعمل فلوس حلوة وأصرف منها على أمي وأختي وعلى نفسي.
س: ما هي علاقتك بنهى رؤوف مشيل إسكندر؟
ج: أنا معرفهاش شخصيًا، وما شوفتهاش غير مرة، بس أعرف أنها هي اللي مشغلة المحلات  اللي في الهرم واللي في المعادي وهي الكبيرة في الحوار ده كله.
س: وما هي ظروف تقابلك مع نهى رؤوف مشيل إسكندر؟
ج: انا لما قابلتها كانت مرة  في المعادي وما اتكلمناش أنا وهي علي طول مع بعض، بس هي شغال معاها واحد تاني ومعرفش باقي اسمه هو اللي أنا اتعاملت معاه واتعرفت عليه واشتغلت تحت منه واتفقت معاه في كل حاجة وهو اللي كان بيديني الفلوس بعد ما أقعد اليوم في المحل.
س من كان برفقتك آنذاك ؟
ج: كنت أنا لوحدي.
س: ما سبب ومناسبة تواجدك بالمكان والزمان سالفي الذكر؟
ج: كنت رايحة عشان أسهر وآخد أي حاجة من المحل في آخر اليوم عشان أدخل فلوس ليا ولأمي وأصرف عليها.
س وهل المتهمة لها سيطرة عليك من أي ناحية؟
ج: لا هي ما كنتش بتظهر كتير أصلًا.
س: هل سالفة الذكر لها ولاية عليك أو قرابة؟
ج:لا، ولا قريبتي ولا ليا بيها أي علاقة ولا هي ليها عليا أي سلطة.
س ما هو الاتفاق الذي تم فيما بينك وبين سالف الذكر؟
ج اتفاق كان إني أنا هنزل أقعد في المحل على الترابيزة أبقي منظر للمكان والزباين تشوف أنه في بنات في المكان ويجيبوا زباين كتير للمحل، وأنا في آخر اليوم هاخد مثلًا 400 جنيه أو 300 جنيه علي حسب الزباين اللي جت في اليوم وفيه شغل كويس، وقالي لو فيه شغل كويس أكتر هتاخدي 500 جنيه، وفعلا كان في أيام بيبقي فيها شغل كويس كان بيديني 500 جنيه وأكثر ويقولي إن الريسة نهى مبسوطة منك وكده.

س: وما هو النفع العائد عليك من جراء ذلك الاتفاق؟
ج: إن أنا باعمل فلوس كويسة في اليوم الواحد في حدود 400 جنيه مثلًا عشان بس أقعد شوية علي الترابيزة وأرقص شوية فى المكان.
س: وما هو النفع العائد على  نهي رؤوف مشيل إسكندر من جراء ذلك الاتفاق؟
ج: إن المكان اللي أنا أعرف إنه بتاعها بيعمل فلوس كتير وبيجي زباين كتيرة ليها بس علي حس إنه فيه بنات قاعدة وبترقص في المكان، وهي اللي اسمها الريسة وبتعمل فلوس كتير.

س: وهل قمتِ بإخبارهم بحالتك المادية وحاجتك إلى المال؟
ج: أيوة، أنا قلت إني حالتي المادية صعبة وإن أبويا ميت وإني بصرف على أمي وأختي وإن أمي بتشحت في الشارع بردو بتلم رزقها، وإن أنا محتاجة دخل وفلوس عشان أعرف أعيش أنا وأمي وأختي.
س:وما هو الوعد الذي قمتي بأخذه من سالفة الذكر؟
ج أنا أخدت وعد إني لما أقعد على الترابيزة في المحل الملهي ده وأبقي زي واجهة للمكان إنه في بنات وكده، إني هاخد في اليوم الفلوس اللي قلت عليها.
س وما هو المبلغ الذي كنت تتقاضينه تحديدًا مقابل العمل بذلك المقهي التابع لنهى الدكر؟
ج: أنا كنت باخد في اليوم 400 جنيه وساعات 500 جنيه على حسب السعر والمحل عمل زباین وفلوس كويسه وفي شغل ولا لأ.
س: وما عدد المرات التي قمتِ بالتواجد بالمكان التابع لنهي الدكر؟
ج:انا كنت بروح كتير يعني كل ما أبقي عايزة فلوس بس مش عارفة كام مرة بظبط.