كنت تحت ضغط عصبي.. أحمد ماهر يعتذر لـ ياسر ورامز جلال بعد سب والدهما: قُلت من عشمي والصداقة | خاص
علق الفنان أحمد ماهر، على مقاضاة كل من الفنان ياسر جلال ورامز جلال له، بسبب إساءته لوالدهما عبر أحد اللقاءات، مما تسبب في إحالته للتحقيق داخل نقابة المهن التمثيلية بقرار من الدكتور أشرف زكي نقيب المهن التمثيلية.
وقال أحمد ماهر خلال تسجيل صوتي مع القاهرة 24: حقهم يقاضوني، والنقابة طالباني للتحقيق وده أمر طبيعي، لأن أنا كنت عضو مجلس نقابة، واللي أذيع على السوشيال ميديا لا يصح، ولكن كنت خارج من حالة عزاء ومشحون واتكالبوا علي بالموبايلات والكاميرات وكنت تحت ضغط عصبي على شخصي، ركبت العربية وكنت طلبت السواق، واترموا قصاد العربية قصاد الكبوت وده استفزني.
أزمة أحمد ماهر وياسر ورامز جلال
وتابع أحمد ماهر: جه ولد صورني وأنا في ضغط نفسي وعصبي أتمارس عليا، وسألني تقول إيه لرامز بعد حلقتك معاه فقولت ده بشكل عفوي وزلة لسان مش مقصودة.
وتحدث الفنان أحمد ماهر عن علاقته بالفنانين رامز جلال وياسر جلال ووالدهما، قائلًا: الولدين دول أنا اللي مربيهم وكلت في بيت أبوهم عيش وملح، بحكم الصداقه اللي بيني وبين أبوهم، زي ما كنت بهزر مع الراجل الجملة طلعت، بكل ما فيا من عشم وصداقه.
وأكد الفنان أحمد ماهر، أنه كان غاضبًا من الحلقة التي صورها مع الفنان رامز جلال في أحد مواسم برامجه، قائلًا: المراسل سألني وقت أنا متضايق من الحلقة كنت مجروح، الولد نكشني في حته ملتهبة جوايا وسألت نفسي هو ده الولد اللي ربيته يعمل فيا كده، والفيديو ده قديم من 5 شهور تقريبا.
كما أشار أحمد ماهر: رامز وياسر محدش فيهم كلمني لأنهم مختصمين معايا، والنقابة هي اللي بتتولى الأمر واستحاله أكلمهم الا لو حصل جلسة، والسلوك اللي اتبعوه ده سلوك ولو مقاضونيش ميكونوش ولاد حلال، والنقابة لم تحدد موعد للتحقيق.
