أقوال الحاج بدر صاحب السبحة في واقعة أتوبيس بالمعادي: اتفاجأت بالبنت بتصرخ وتقول اتحرش بيا وكان فيه مسافة متر ونص بينهم

كشفت التحقيقات في واقعة اتهام شخص بالتحرش بفتاة في أتوبيس نقل عام بمحافظة القاهرة، استدعاء أحد شهود النفي على الواقعة، وهو الشاهد المعروف إعلاميًا بـ الحاج بدر صاحب السبحة.

ويواصل القاهرة 24 نشر نص التحقيقات في القضية، التي حملت رقم 2014 لسنة 2026 جنح قسم المقطم.

واستمعت جهات التحقيق إلى أقوال صاحب السبحة وبسؤاله، ما هي صلتك بالواقعة محل التحقيق؟
ج: أنا كنت راكب الأوتوبيس اللي حصل فيه الواقعة.

س: وما معلوماتك بشأن الواقعة محل التحقيق؟
ج: يوم 2026/2/8 كنت راكب أتوبيس، وبعدين لقيت فجأة واحد ركب ووقف في نص الأتوبيس وكان الأتوبيس مليان ناس قاعدة، ومكنش في ناس كتير واقفة، وكل اللي واقفين حوالي 6 أو 7 اشخاص.

وبعدين فجأة لقيت بنت واقفة وبينها وبين الشخص ده حوالي متر ونص أو أكثر، وفجأة بعد ما الشخص ده طلع بحوالي 20 دقيقة لقيت البنت دي بتصرخ جامد جدا حرامي حرامي، واحنا اتفاجئنا لأن الراجل كان بعيد عنها، وكان فيه واحدة ست قاعدة قريبة منها قالتلها يا بنتي ده بعيد عنك مكلمكيش، والكومسري جه قالها نفس الكلام، وساعتها قالت للست اللي كانت قاعدة إنه كان قبل كدة اتحرش بيها، والناس ساعتها خدوها ناحية السواق ولما راحت هناك فضلت تزعق عشان مصممة إن الشخص ده ينزل، وفضلت تقول ده متحرش كثير جدا، وبعدين لقيناها طلعت التليفون، وبتقول أنا هصورك، وبتقول لينا إنتوا خبيتوه عشان راجل زيكم، وبعد كدة كان فيه عربية نجدة واقفة على الدائري، نزلت البنت من الأتوبيس وراحت على عربية النجدة وجه أمين شرطة والناس حكت ليه اللي حصل، وقالوله إنه معملش حاجة وهي كانت برده عمالة تصرخ في الشارع، وبعدين أمين الشرطة مشي والأتوبيس مشي وهو ده كل اللي حصل.

س متى وأين حدث ذلك؟
ج الكلام ده حصل يوم ۲۰۲۹/۲/۸ حوالي الساعة 7 مساء تقريبا، في أتوبيس عام عند الطريق الدائري في دائرة المقطم - القاهرة.

س: وما هو خط سير تلك المركبة الآلية تحديدًا؟
ج أنا ركبت من محطة مرسيدس وكنت رايح لحد محطة الزهراء بتاعة المترو.

س: ومن أين تحديدا استقل المتهم أسامة. م تلك المركبة الآلية؟
ج هو ركب من محطة البارون تقريبا.

س وأين كانت المجني عليها مريم. ش آنذاك؟
ج أنا مشفتهاش غير بعد ما الراجل ده ركب بشوية، لما عطست أكثر من مرة ورا بعض.

س وحال مشاهدتك للمجني عليها سالفة الذكر ما هي المسافة الفاصلة بينها وبين المتهم سالف الذكر آنذاك؟

ج هي ساعتها كانت واقفة على الشمال، والشاب ده كان على اليمين وكان بينهم حوالي متر ونص.

س وما مدى قيام أيٍّ من سالفي الذكر بالجلوس بتلك المركبة الآلية آنذاك؟
ج لا هما الاتنين كانوا واقفين.