ضربني في مكان حساس ووقعني على الأرض.. ننشر أقوال فرد الأمن ضحية التعدي داخل كمبوند شهير بالتجمع
كشفت التحقيقات في قضية اتهام رجل أعمال بالتعدي بالضرب على فرد أمن داخل كمبوند بالتجمع الخامس، تفاصيل أقوال المجني عليه في القضية.
أقوال فرد الأمن ضحية التعدي داخل كمبوند شهير بالتجمع
روى فرد الأمن تفاصيل الواقعة خلال التحقيقات، وجاءت أقواله في فقرات متتالية على لسانه كالتالي: أنا شغال فرد أمن بكمبوند فيليت سوديك، ومن حوالي 8 شهور تقريبًا الأستاذ معتز بدأ يشطب في الوحدة بتاعته جوه الكمبوند محل عملي، ومن وقتها وهو كل شوية يشتكيني لمدير الأمن ومدير المشروع، عشان العمال لهم ميعاد خروج من الكمبوند الساعة 4،30 مساءً كل يوم، وهو كان عايز يقعدهم بعد الميعاد ده.
وأضاف: العمال كانوا بيتواصلوا معاه وهو مش موجود ويبلغوه إن أنا اللي عايز أمشيهم، مع إن دي تعليمات الكمبوند وهو اللي عاملها وأنا مليش أي يد فيها، وبسبب المشاكل دي تم نقلي من الشارع اللي كنت فيه لمكان تاني، والكلام ده استمر لمدة 5 شهور.
وأوضح: حصلت حركة تنقلات، وامبارح بس رجعت لمكاني القديم اللي كنت واقف فيه حراسة، وامبارح تقريبًا الساعة 12،30 الظهر وأنا قاعد في مكان عملي، لقيته داخل عليّ بعربيته، نزل الإزاز وقالّي: أنا هصورك ومش هخليك تقعد هنا في المشروع تاني، وسابني ودخل بالعربية وركنها قدام الوحدة الخاصة بيه.
وأشار: بعدها لقيته جاي عليّ على رجله وقالّي: "إيه اللي قعدك هنا تاني، وفجأة ضربني برجله عند الخصية بتاعتي، وضربني في بطني، وضربني جنب ودني اليمين، وضربني بالبونية في عيني، ووقعت على الأرض.
وتابع: سبته وقمت ومشيت عشان حسيت إنه في حالة مش طبيعية، وأنا ماشي فضل برضه يضربني بالأقلام ويقولّي: "مش هخليك تقعد هنا تاني يا وشتمني.
وأكمل: بعد كده الأستاذ مجدي نزل من بيته واتدخل علشان يحل الموضوع، لقيته بيقولّه: إنت إيه اللي دخلك يا -ألفاظ نتحفظ عن كتابتها-، وفي الوقت ده العملاء اتلمّت ومشّوه، وكانوا في نفس الوقت اتصلوا بالنجدة، لكنه لما عرف إن النجدة وصلت أخد بعضه ومشي.
وتابع: بعدها توجهنا كلنا على القسم عشان نعمل محضر، واتعرضت على مستشفى القاهرة الجديدة التخصصي علشان أعمل تقرير طبي بحالتي، وجيت النهارده على النيابة علشان أكمل باقي الإجراءات، والكلام ده حصل امبارح 19-2-2026 حوالي الساعة 12،30 الظهر تقريبًا في الكمبوند بالتجمع الخامس، وكنت متواجد في محل عملي كفرد أمن ومكلّف بتأمين الشارع محل الواقعة وتنفيذ تعليمات إدارة الكمبوند الخاصة بمواعيد خروج العمال، وده كل اللي حصل.
