كل واحد عنده زبالة بيرميها فيها.. علي جمعة: أستراليا منعت مَن دون الـ 16 سنة من التعامل على السوشيال ميديا
قال الدكتور علي جمعة، عضو هيئة كبار العلماء بالأزهر الشريف، إنه من بداية 1830 حدث شيء غريب وهو بدء زيادة السكان.
علي جمعة: أستراليا منعت مَن دون 16 سنة إنه يتعامل على السوشيال ميديا
وأضاف علي جمعة خلال برنامجه نور الدين والشباب: 1830 حصل فيها حاجة غريبة وهي بدء زيادة السكان، ابتدأ المنحنى بتاع السكان يطلع كده ومش راضي ينزل لغاية دلوقتي، لكن قبل 1830 كان بيطلع وينزل حسب الكوارث والحروب والمجاعات والمية وحاجات كتير.
وواصل: بعد 1830 ابتدت الأدوية تدخل في حياة الإنسان ويبقى لها ترتيب معين والاهتمام بالطفولة ورعايتها فدا معرضش الأطفال لوفيات أكتر وبدأت زيادة السكان بطريقة بيسموها غير منضبطة.
وتابع: السوشيال ميديا سلاح ذو حدين، فعايزين نستفيد من خيره وعايزين نتقي شره؛ لأن المسألة وصلت إلى مسألة توحد الأطفال مع الآلة دي والمواقع دي وكل واحد عنده زبالة بيرميها فيها.
وأكمل: سمعنا قريبا إن أستراليا منعت من دون 16 سنة إنه يتعامل على السوشيال ميديا؛ عشان يحافظوا على إنسانيتهم لأنهم تحولوا بالشكل ده إلى مسألة مجنونة، مسألة غير معقولة، مسألة تهدد الاجتماع البشري، مضيفا: فيجب علينا جميعا كشباب وككبار وقادة وسادة وعلماء ومفكرين إن إحنا نتعاون في التعامل مع هذه الظاهرة.
وأوضح: أصبح الآن في الأسرة من عقوبة الأولاد إنه يحرمه من السوشيال ميديا: إما إنه هو ما يجيبلوش الجهاز، وإما إنه هو يسحب منه جهاز، وإما إنه هو يضيق عليه فيه، لكن هو ده حل، هو المنع حل، خاصة إنه هو بيروح يمين وشمال ولصاحبه وتبقى الواقعة واقعتين، مشكلة في مشكلة يجب إن إحنا جميعا نتكلم بها بصوت عالي وبصراحة علشان نوصل لحل.
