اليوم.. محاكمة المتهم بالتحرش بفتاة أتوبيس المعادي
تنظر المحكمة المختصة، اليوم الثلاثاء، أولى جلسات محاكمة المتهم بالتحرش بفتاة تدعى م. ش داخل إحدى مواصلات النقل العام.
محاكمة المتهم بالتحرش بفتاة أتوبيس المعادي
وكشفت التحقيقات في واقعة أتوبيس المعادي، تفاصيل الاتهام المتبادل بين الطرفين، حيث استمعت جهات التحقيق لأقوال المتهم في القضية رقم 2014 لسنة 2026 جنح قسم المقطم، بشأن الواقعة التي أثارت جدلًا واسعًا عقب تداول مقطع فيديو لها على مواقع التواصل الاجتماعي.
وحصل القاهرة 24 على نص أقوال المتهم في واقعة أتوبيس المعادي، والتي كشفت عن تفاصيل مع دار بينه وبين الفتاة وسبب الخلاف بينهما في القضية.
وجاءت أقوال المتهم في واقعة أتوبيس المعادي أمام جهات التحقيق بسؤاله ما معلومات بشأن الواقعة محل التحقيق كالآتي: اللي حصل إن أنا حداد شغال في الأتوبيس الترددي عند كمبوند البارون كنت راكب أتوبيس النقل العام علشان كنت مروح البيت، وفجأة لقيت واحدة في قلب الأتوبيس بتقول بأعلى صوتها حرامي متحرش، فأنا فضلت واقف مكاني مصدوم من اللي بتقوله، ولقيت الناس اللي كانوا راكبين الأتوبيس بيدافعوا عني، وكنت واقف مش عارف اللي هي بتقوله ده، لحد ما لقيتها مرة واحدة طلعت من جيبها تليفون، وبقت تصورني، فأنا لفيت ضهري علشان مش عايزها تصورني، ولقيتها مصممة إنها تصور، فأنا رجعت ورا الأتوبيس، وفضلت عمالة تزعق، والناس قالتلي: إحنا شايفين كل حاجة، وكانت عمالة بتقول: وديني لأحبسك وأفضحك.
وأضاف المتهم: بعدها لقيت واحد من الركاب كان ماسك سبحة، قالها: انتي تعرفي ايه عن الدين؟ الدين بريء منك ومن أمثالك.. فأنا قولتلها بالنص: (تعرفي ايه عن الدين باللبس اللي انتي لابساه ده)، وروحت ناحيتها علشان أنزل التليفون اللي هي مسكاه، لاقتها بعدت التليفون بتاعها وراحت عند أول الأوتوبيس، والناس حوطت عليا.
وتابع: دافعوا عني لحد ما هي نزلت عند نقطة شرطة، اشتكت لأفراد الشرطة علشان يقبضوا عليّا، الناس دافعوا عني وقالوا إن أنا معملتش أي حاجة، ورحت البيت لقيت مراتي بتصحيني وبتقولي فيه واحدة منزلة فيديو بتتبلى عليك، وبعد كده لقيت القسم بيكلمني ورحت القسم من نفسي وحكيتلهم كل اللي حصل، وإنها بترمي بلاها عليا، وده باين من الفيديو.
