طبعت علم إسرائيل وكنت خايفة منه.. ننشر أقوال صاحبة محل الإكسسوارات في قضية سائق سيارة كرداسة | خاص
حصل القاهرة 24 على التحقيقات في قضية دهس 6 أشخاص أسفل سيارة جيب وبها علم إسرائيل بمنطقة كرداسة بالجيزة، والتي حوت اعترافات المتهم ووالده وأقوال المصابين، والفتاة التي طبعت علم إسرائيل ووضعته على السيارة.
ننشر أقوال صاحبة محل الإكسسوارات في قضية سائق كرداسة
وكشفت التحقيقات أنه باستدعاء الفتاة التي طبعت علم إسرائيل ووضعته على السيارة الجيب الخاصة بالمتهم، وبسؤالها حول ما هي معلوماتها بالواقعة محل التحقيق؟ أجابت: اللي حصل إن يوم 26/2/2026 أنا كنت واقفة في محل إكسسوارات السيارة بتاع والدي علشان والدي كان بيصلي التراويح؛ وفوجئت أن أحمد عادل، جالي المحل وطلعلي على الموبايل بتاعه صورة علم إسرائيل وطلب مني أطبعه ليه وأعمله ليه استيكر علشان يلزقه على الزجاج بتاع العربية بتاعته.
وأكملت الفتاة: أنا في الأول رفضت أطبعه علشان دا مش العلم بتاعنا ودا علم إسرائيل، بس هو قعد يلح عليا أعمله وأنا عارفه إنه تعبان نفسيًا، وخوفت يعمل حاجة فيا، وبعت لي العلم على الواتس آب وأنا طبعته من على ماكينة الطباعة نسختين وبعدين أنا لزقتله كل علم على شباك زجاج السيارة الخلفي من الناحيتين اليمين واليسار وأعطاني مائة جنيه ومشي بالعربية بتاعته ودا كل اللي حصل
كما جاءت باقي تفصيلات أقوالها، كالآتي:
س: متي وأين حدث ذلك؟
ج الكلام ده حصل إمبارح الموافق 26 فبراير 2026 الساعة 10:50 مساء - بالمحل الخاص بوالدي بناحية قرية كوميرة - مركز كرداسة - الجيزة
س: ما سبب ومناسبة تواجدك بالزمان والمكان سالفي الذكر؟
ج: أنا كنت واقفة في محل الإكسسوارات بتاع السيارة الخاص بوالدي.
س: ماذا كان وقع الحاجة عليك آنذاك؟
ج: أنا لما لقيته بيلح كثير وافقت لأن أنا عارفه إنه مريض نفسي وخفت يعمل فيّا حاجة.
س: وكيف تحصلت على صورة ذلك العلم آنذاك؟
ج: أحمد طلعلي العلم دا من على موبايله وبعته لي على الواتس آب علشان أطبعه ليه.
س وكيف تمكنت من طباعة تلك الصورة آنذاك؟
ج: هو لما بعتهالي علي الواتس آب أنا طبعتها من علي ماكينة الطباعة الخاصة بالمحل في صورة ملصق علشان يلزقها على زجاج السيارة بتاعته.
س: كم نسخة قمتِ بطباعتها آنذاك؟
ج: أنا طبعت نسختين في ذلك التوقيت.
س: من الذي لصق تلك النسختين علي السيارة الخاصة في ذلك التوقيت؟
ج: أنا اللي لزقتهم في ذلك التوقيت.
