أسامة نبيه: مش لازم أطلع أقول للجمهور أنا فشلت.. وعملت إنجازات مع منتخب الشباب
يرى أسامة نبيه نجم الزمالك ومنتخب مصر الأسبق، أن تصريحاته تم تفسيرها بشكل خاطئ بعد رحيله عن منتخب الشباب عقب وداع كأس العالم بتشيلي.
تصريحات أسامة نبيه
وقال أسامة نبيه، في تصريحات إذاعية: الناس كانت عايزة تسمع مني بعد رحيلي عن منتخب الشباب أنا فاشل، وأنا طلعت قولت حصل إخفاق وعدم توفيق، اختلفوا معايا مع إن مش لازم أطلع أقول للجمهور أنا فشلت.
وأضاف: شغل المنتخبات مختلف عن شغل الأندية، تجربتي مع منتخب الشباب ليها وعليها، بس محدش بيقول إن منتخب الشباب اتأهل لكأس العالم بعد 12 سنة غياب من أيام جيل ربيع ياسين.
وتابع أسامة نبيه: مش ندمان على تجربتي مع منتخب الشباب، لأن فيها إنجازات، أنا تاسع مدرب قاد منتخب شباب على مدار 50 سنة، كنت محتاج فترة زمنية وتأهيل وتجهيز، وخرجت من كأس العالم بسبب الكروت الصفراء.
وأكمل: الناس خدت تصريحاتي بغرابة عشان قولت منقدرش نكسب اليابان، محدش سمع مني أنا ليه قولت كده، صحفي كبير طلع كتب أسامة نبيه مش عارف الفرق بين مصر واليابان، فقولت له آه أنا مش عارف الفرق، لما تتوفر الظروف المهيئة لمنتخب مصر زي اليابان، وقتها هعرف الفرق.
وقال أسامة نبيه: كلفت من هاني أبو ريدة في ديسمبر 2024 بتولي مسؤولية تدريب منتخب الشباب، وتوليت المسؤولية فعلًا في فبراير 2025 وحتى يونيو 2025، يعني شهور ورحلة قصيرة، والأمور مكنتش كويسة، فقررت الاعتذار بعد نهاية كأس العالم، وده طبيعي عشان أرفع الحرج عن مجلس الإدارة.
وواصل: كنت عامل برنامج مدته سنين ونصف، وفاكر أن الدنيا هيكون فيها استقرار زي فترة وجودي مع المنتخب الأول، لكن ده محصلش، وأي جهاز عشان ينجح لازم يكون عنده استقرار.
واختتم نبيه تصريحاته: مش هنكر إني استعجلت في الظهور التليفزيوني بعد رحيلي عن منتخب الشباب، بس برضه كلامي اتقطع وخرج للناس بطريقة تانية.
