محمد الدماطي: محدش في الأهلي سعيد بالنتائج.. ومش عايزين تنمر وخناقات على لاعيبة
كتب محمد الدماطي، عضو مجلس إدارة النادي الأهلي، رسالة مطولة عبر حسابه الرسمي على موقع فيسبوك، تحدث خلالها عن الأوضاع الحالية داخل النادي، موجّهًا عدة رسائل للجماهير بشأن النتائج الأخيرة، وأهمية التكاتف في المرحلة المقبلة، في ظل الضغوط التي يمر بها الفريق.
تصريحات محمد الدماطي
وقال الدماطي: بقالي حوالي شهر ونص قافل فيسبوك وكل السوشيال ميديا تمامًا، وإمبارح بس فتحت ونزلت صورتي مع محمود الخطيب كنوع من الدعم الأدبي لراجل عمل كتير للنادي وبيفضل النادي على نفسه، وله فضل عليّا بعد ربنا إني أكون موجود وأمثل كيان الأهلي العظيم.
وأضاف: فرصة، بما إن في حالة هدوء حتى لو مؤقت، أقول كلمتين لعل وعسى يحصل نوع من التوضيح. وكالعادة أنا بتكلم من قلبي وبما يرضي الله، ومش بزعل من أي نقد أو تجريح؛ لأني عارف إن دي ضريبة المكان اللي أنا فيه، ولأني متأكد إن النادي الأهلي هو مصدر السعادة يمكن الوحيدة لـ80 مليون بني آدم، فطبيعي يحصل زعل، زي ما في أي نجاح بيحصل إشادة، ودايمًا بقول: مش بعرف مهما حاولت أستخبى وقت التراجع، طالما بظهر وقت النجاح.
وأشار محمد الدماطي في تصريحاته: مفيش حد أبدًا سعيد بالنتائج، وده كان واضح في بيان النادي إن في عملية إصلاحات كبيرة هتتنفذ الفترة الجاية، وطبيعي في أي منظومة في العالم، نادي أو شركة أو أي مكان، في ضغوطات مستمرة يحصل أخطاء نتيجة الضغط ده، الإنسان بطبيعته طول ما هو مضغوط ممكن يغلط، والشطارة إن الأخطاء تبقى قليلة ويتم تداركها سريعًا، واعتقد إن حجم البطولات والإنجازات في الـ8 سنين أكبر بكتير من حجم الإخفاقات، ولكن ده حالنا كنادي أهلي: مش بنقبل الإخفاق، وده سبب النجاح المستمر، لكن ممكن يبقى سبب أحيانًا في أخطاء.
وأفاد: الضغط المستمر اللي بيولد أخطاء مش بس على الإدارة، ممكن كمان يكون على المدربين واللاعيبة، ممكن الاختيار فنيًا يكون سليم، لكن قدرة المدرب أو اللاعب على استيعاب حجم المتطلبات والضغوطات تبقى ضعيفة، وده بيحصل وطبيعي، وشفناه مع لاعيبة كتير سواء ما نجحوش أو قدرتهم على العطاء في أعلى مستوى ما كانتش فيها استمرارية طويلة، وممكن يخسرنا مدربين ولاعيبة ممتازين بسبب حرصنا المستمر على عدم الإخفاق أو إعطاء فرص.
وأردف محمد الدماطي: النادي الأهلي بيستمد قوته من جمهوره، محتاجين الجمهور يبقى كله على قلب راجل واحد، وهنا مش قصدي الإدارة، قصدي النادي، مش عايزين خناقات وتنمر على لاعيبة، مش عايزين خناقات فنية على لاعبين عشان انتصار لوجهة نظر أو حب وكره؛ اللي بيلعب راجل، إحنا كلنا في ضهره، عايزين نبص على الكورة ككورة، وكلنا نبقى وحدة واحدة، عندنا مشكلة في المدرج واتكلمت عليها، وكمية الرسايل والشتيمة اللي جتلي مش طبيعية، بس أكدتلي حاجة واحدة إن ده ملف مهم جدًا وحساس جدًا، ووالله ما حد مقصر، بس في رواسب ومشاكل محتاجة وقت وثقة من الجميع، مش مهم مين يبقى موجود، مش مهم المسمى، كلنا جمهور الأهلي، من أيام ما كانت التالتة دي هي التانية دلوقتي، من أيام عم حسين ربنا يرحمه، لا كنا بنقول مين بيقودنا، ولا كان في دماغنا حاجة غير التشجيع، وكنا بنتضرب من الأمن المركزي بالخرزانات كل ماتش وبتعدي، بس للأسف كله نسي الأيام دي.
وأكد: الأهلي كبير وكبير أوي، وطالما اخترنا كلنا إن طموحنا يبقى ملوش حدود، يبقى لازم نفهم إن ممكن ده يسبب أخطاء. وتاني، مش بتكلم عن إدارة بس، بتكلم على لاعيبة ومدربين، وعلى الجمهور كمان؛ لأن طموحنا الكبير ده خلانا مش بنعرف نفرح عشان دايمًا باصين لفوق أكتر، أنا في الآخر جمهور وطالع من المدرج، وربنا يعلم أنا بحب الأهلي قد إيه، وشايف إن كلنا لازم على قد ما نضغط، يبقى دايمًا ضغطنا إيجابي ويبقى دايمًا عامل نجاح، هنرجع؟ أكيد هنرجع إن شاء الله، النادي الأهلي منظومة مش بتعرف الفشل، حصل تراجع؟ أكيد حصل وبيحصل، والتاريخ بيقول كده، وبالعكس على قد ما ضغط الجمهور صعب، بس لما الضغط زاد في السنين الأخيرة، العودة بتبقى أسرع وبكتير، شفنا زمان فترات تراجع أطول وأوحش لما الضغط كان أقل.
وأتم محمد الدماطي: اسم الأهلي زي الجبل، ما يهزّه ريح طول ما الكل حاطط اسم الأهلي قدامه، أعظم نادي في الكون.
