شوبير: العبد لله أول واحد نوّر اللمبة على حمزة عبد الكريم.. ومخدش حقه مع الأهلي لهذا السبب
تحدث الإعلامي أحمد شوبير عن عدة ملفات مهمة تخص الكرة المصرية، أبرزها ملف حمزة عبدالكريم، وأزمة تكرار الحكام، والحالة الصحية لـ أيمن منصور نجم الزمالك ومنتخب مصر سابقًا وعضو مجلس إدارة نادي مودرن سبورن، بعد تعرضه لـ وعكة صحية.
تصريحات أحمد شوبير
قال شوبير خلال تصريحات إذاعية قبل قليل: أنا عايز الناس تهدى شوية بخصوص موضوع حمزة عبدالكريم، لأن في كلام كتير متداول دلوقتي، زي إن سعره وصل لـ3 مليون دولار، وإنه قريب من برشلونة، وكمان إن الأهلي ممكن يدخل خزينته ملايين من الصفقة، أنا أكتر واحد يتمنى ده يحصل، بس خلّونا نهدي شوية لحد ما الأمور تتضح، وكل التفاصيل تبان خلال الأيام الجاية.
وواصل شوبير: العبد لله أول واحد نور اللمبة على حمزة عبدالكريم، واتكلمت عليه أكتر من مرة، وطلبت من النادي الأهلي إنه يبص على الولد، ويديله فرصة لأنه يستحق، وللأمانة أكتر واحد ادا لحمزة حقه هو الكابتن أحمد الكاس في منتخب الناشئين، ومخدش حقه مع النادي الأهلي أوي، لأن أحنا في مصر عامةً بنتحب ندي اللعيب الفرصة متأخر شوية، أو وهو نتقدم في السن، ودي طبيعة عندنا، وقدمنا أمثلو كثير في أوروبا.
وكشف شوبير: امبارح أوسكار رويز اجتمع بحكام مباريات الزمالك وبيراميدز والأهلي، وتمرينات وشغلانة وحدوتة، لكن أنا بصراحة عندي اندهاش، لأن الماتش قبل اللي فات كان محمد الغازي بيحكم مباراة الزمالك وبيراميدز، وقدم مباراة كويسة جدًا، وده من ماتشين، ترجع تكرر الغازي تاني ليه؟ وأنا والله ما عنديش أي شك تجاه الحكم محمد الغازي، وكلامي هنا موجه لأوسكار رويز.
وأوضح: أوسكار رويز ماحسبش حساباته من أول موسم بشكل كويس، عمل مدبحة للحكام ومشى أحمد الغندور ومحمود البنا ومحمد عادل والحنفي ونادر قمر الدولة، والناس نبهته من البداية وقالوا له إن كده هنضطر نكرر الحكام، وما تخسرناش حكام بيساعدونا بشكل كويس.
وأكمل: الراجل لأن رأيه من دماغه، ومش عارف الأجواء في مصر عاملة إزاي، فـ ملاهش لازمة يعني، وكان لازم لحد ما نجهز حكام، الأمور تمشي واحدة واحدة، لكنه رفض وأصم ودانه تمامًا، فبالتالي بقينا مضطرين نكرر الحكام لنفس الفرق، وده بيعمل أزمة.
وطمأن شوبير الجماهير على الحالة الصحية لأيمن منصور نجم الزمالك ومنتخب مصر السابق وعضو مجلس إدارة نادي مودرن سبورت، حيث قال إن أيمن منصور كان يعاني منذ فترة طويلة من مشكلة في الظهر، ما استدعى خضوعه لعملية جراحية.
وأكد شوبير أن حالة أيمن منصور أصبحت مطمئنة وجيدة بعد الجراحة، متمنيًا له الشفاء العاجل، قائلًا: ألف سلامة عليك يا كابتن أيمن.
