يحيى الدرع: منتخب مصر أصبح من كبار العالم.. وهدفنا ميدالية أولمبية
أكد نجم منتخب مصر لكرة اليد يحيى الدرع، أن الجيل الحالي للمنتخب يواصل كتابة التاريخ للرياضة المصرية، بعد التتويج بالبطولة الإفريقية للمرة الرابعة على التوالي، مشددًا على أن الحفاظ على القمة أصبح أصعب من الوصول إليها.
يحيى الدرع: منتخب مصر أصبح من كبار العالم.. وهدفنا ميدالية أولمبية
وقال يحيى الدرع، لـ القاهرة 24 على هامش حفل تكريم المنتخب: الحمد لله على المكسب للمرة الرابعة على التوالي، دي حاجة تاريخية بنكتبها باسمنا وباسم كرة اليد المصرية والرياضة المصرية، وإحنا وصلنا إلى مكانة عالمية وتصنيف كبير، لكن الأساس بالنسبة لنا هو إفريقيا.
وأضاف نجم منتخب اليد: الحفاظ على الشكل والمكانة اللي وصلنا لها مش سهل، وبيحتاج تضحيات وتحمل عصبي وذهني أكبر، لأن الناس بقت مستنية منك دايمًا الأكتر، لكن الضغط ده بالنسبة لنا حافز إننا بقينا من الفرق الكبيرة.
وعن خسارة المنتخب في اللحظات الأخيرة أمام كبار العالم خلال البطولات الكبرى، أوضح الدرع: أنا مش مؤمن بحاجة اسمها سوء حظ، إحنا بقينا قريبين جدًا من الكبار، وبقينا منتخب الناس بتحسب له ألف حساب، ولما تخسر من فرنسا أو الدنمارك أو إسبانيا بفارق هدف أو بركلات الترجيح، ده معناه إنك بقيت في نفس مستواهم.
وأشار لاعب فيزبريم إلى أن المنتخبات الكبرى أصبحت تتابع منتخب مصر بشكل مختلف، قائلًا: الفرق الكبيرة بقت تجهز لنا وبتحترمنا وبتخاف مننا، لأننا بقينا بنهدد كبار العالم، وده دليل إن منتخب مصر بقى منتخب كبير.
وتحدث يحيى الدرع عن الضغوط التي يعيشها بسبب طموحات الجماهير ومتابعته في دوري أبطال أوروبا، مؤكدًا: أكيد فيه ضغط، لكن دايمًا بفكر نفسي أنا اخترت اللعبة دي ليه من البداية، عشان أكون مبسوط وأبسط الناس، وده اللي بيخليني دايمًا جعان للنجاح.
واختتم نجم منتخب مصر تصريحاته بالكشف عن أهدافه المقبلة، حيث قال: هدفنا مع المنتخب تحقيق ميدالية أولمبية والتواجد ضمن أفضل 3 منتخبات في العالم، وأتمنى نكسب كأس العالم، ومع فيزبريم هدفي الفوز بدوري أبطال أوروبا.
