مراته ولدت وهو محتجز.. أول تعليق من والدة أدهم طباخ السفينة المحتجزة قبالة الصومال: كان طالع على أكل عيشه
كشفت والدة أدهم سالم شعبان جابر، أحد أفراد طاقم السفينة المحتجزة من قبل القراصنة قبالة الصومال، الذي يعمل طباخ على السفينة، تفاصيل جديدة حول احتجاز نجلها رفقة عدد من البحارة المصريين، حيث قالت: عرفنا باحتجازة من خلال السوشيال ميديا، وكنا في انتظار مكالمته لينا عشان ميعاد ولادة زوجته كان يوم 5 مايو، ولكن لم يصل منه أي إتصال.
أول تعليق من والدة أدهم طباخ السفينة المحتجزة قبالة الصومال
وقالت والدة أدهم، في تصريحات خاصة لـ القاهرة 24: أول مولودة له جت الدنيا وهو محتجز، ومفيش معاه أي تواصل، ومنعرفش عنه أي حاجة، وكنا في استغراب انه متصلش لما زوجته ولدت، وفوجئت بإسمه على منصات التواصل الإجتماعي، ضمن البحارة المحتجزين على السفينة من قبل القراصنة قبالة الصومال، وكانت صدمة كبيرة لينا، ومن يومها واحنا في حالة سيئة، منعرفش عنه حاجة نفسي اطمن عليه وأسمع صوته.
وأضافت: كل اللي عرفته عنه إن الأكل والشرب خلصوا على السفينة، وحالته هو وزمايله سيئة ووضعهم مرعب، ابني وزمايله كل يوم بيشوفوا الرعب بعينهم وعايشين تحت تهديد الأسلحة، ابني حتة من قلبي وعايزة أطمن عليه، وبناشد بإنقاذ أدهم وعودته لأرض الوطن هو وزمايله.
واستكملت: أدهم عنده 31 سنة وكان طالع يشتغل ويكافح عشان لقمة العيش، وبطالب الشركة بالتتحرك الفوري والسريع لإنقاذ البحارة المحتجزين، القراصنة تفاوضوا على 3 مليون دولار ورفعوا السعر لـ 10 مليون دولار، كسروا فرحتنا بالمولودة الجديدة مش عارفين نفرح، ومش احنا لوحدنا كل أسر المحتجزين في حالة حزن وقلق على أبناءهم البحارة.
