حسام حسن: استقريت على تشكيل منتخب مصر في كأس العالم بنسبة 90%.. وحددت الحارس الأساسي
قال حسام حسن المدير الفني لمنتخب مصر، إنه حدد التشكيل الذي سيخوض به غِمار منافسات كأس العالم 2026 بنسبة 90%، وحدد أيضًا الحارس الأساسي لـ الفراعنة.
تصريحات حسام حسن
وفي تصريحات مع الإعلامي سيف زاهر عبر قناة أون سبورت، أضاف حسام حسن: المدرب لازم يبقا عنده فِكر وابتكار وقد يخطئ وقد يصيب، ولو المدرب قلّد شخص تاني عمره ما هيوصل ولا حد هيحس بيه، والحمد لله الواحد وصل لتدريب المنتخب بالشطارة عشان انتهجنا نهج خاص به، ووصلنا بفضل ربنا أولًا ثم الجمهور اللي طالب بينا، والناس اللي آمنت بينا، والناس بقا هي اللي تقول تجربتنا نجحت ولا ايه.
وأشار حسام حسن في تصريحاته: أنا معرفش عقدي مع منتخب مصر، وأنا في أي نادي مش ببقا عارف الاتفاق، وبشتغل وسايبها على الله ومش عايز أثبت نفسي بل عايز الناس دي تفرح بينا والجمهور اللي كان عايزنا نبقا هنا في المكانة دي فنرفع رأسهم، وبالمقارنة بالمنتخبات الإفريقية المتواجدة فمنتخب مصر ولاعبيه كانوا محتاجين نفس الإمكانيات والخبرات اللي الدول الأخرى أعطوها للاعبيهم في أوروبا واللي انت عملته صناعة محلية 100%.
وتابع: الخبرات والاحتكاك والقوة والتحمل بين اللاعب المحلي والمحترف بتختلف، وأنا باخد أقصى حاجة من اللاعب، وهناك احترام متبادل مع كباتن المنتخب، وعرفوا إن مصلحتنا واحدة فـ متعاونين كلنا سوا.
وأفاد حسام حسن في تصريحاته: إمام عاشور عشان كان يلعب بعد المرض اللي جاله كان يلعب السنة الجاية ولكن احنا اختصرنا كتير جدًا، وجميع لاعبي المنتخب كانوا عندهم مشكلة في الثقة مع بداية مشوارنا في كأس الأمم، من أول الشناوي حتى مصطفى محمد، ومحمد هاني نفس الشيء كان على طول بيحاول يثبت نفسه وبيصعب عليا، وعشان تديله الثقة ويظهر معانا بمستوى قوي لازم تديله ظروف معينة وحلول تانية، ورامي ربيعة كان عنده إصابة في الإمارات ولعب معانا بأداء رائع، وصلاح كمان عنده مشكلة كبيرة جاي المنتخب بيها وهو مش بيلعب مع ليفربول، ومرموش كان فيه كلام إنه هيمشي من السيتي، ومصطفى محمد الناس عارفة الظروف في فرنسا وإنه مش بيلعب، والقوام الأساسي كله كان بيعاني من مشكلة في الثقة.
وأردف: واحنا في البطولة هناك كنا عارفين إنها صعبة جدًا، وكل المباريات كانت صعبة للغاية، حتى مباراة بنين وأنجولا، ولكن انتصرنا في الكل، ودا مكنش بالصدفة، بل كان اجتهاد كبير، حتى التأهل للأمم وللمونديال دون هزيمة دا صعب.
وذكر حسام حسن في تصريحاته: استقريت على تشكيل المنتخب في كأس العالم 2026 بنسبة 90% وعارف مين هو الحارس الأساسي ولكن هيتوقف على الحالة قبل البطولة.
واستطرد: أحلى وأفضل ذكرى بالنسبة لي هي الوصول مع منتخب مصر إلى كأس العالم 1990 على حساب الجزائر، والوصول إلى المونديال مع الفراعنة كان حلم كبير، وأحمد رمزي والكأس وإسماعيل يوسف وأشرف قاسم كانوا من أقرب اللاعبين لي في منتخب مصر.
واستمر: مكنتش أعرف حاجة عن لقب “عميد لاعبي العالم” وكان كل هدفي أسعد الشعب المصري، وأول ما أنزل الملعب الناس اللي بتثق فينا تفرح، وعرفت في الآخر من كابتن سمير عدلي إن فيه حاجة اسمها “عميد لاعبي العالم” ودي حاجة متتنسيش، وإن بلاتر رئيس فيفا يجي يكرمني دي تاريخ وشرف وفخر كبير لي، وعمرنا ما حضرنا في الاستاد واحنا صغيرين، وخدنا على الجو في الملعب مع ناشئين النادي الأهلي
وأتم تصريحاته: الحماس على طول موجود، ولكن الصورة كانت بتتنقل بالطريقة الخاطئة، واللعبة بتاعتنا كلها ردود أفعال، وممكن تترجم بردود أفعال سلبية، والأمور بتختلف حسب الخبرات اللي انت خدتها، وبنحاول إننا دلوقتي نسيطر على انفعالاتنا عشان بنمثّل مصر ولازم نظهر بأفضل شكل، ومثل أعلى لكل المتواجدين في مصر، وكل المدربين في مصر، واحنا كـ مصريين بنحاول إننا نبقى في مكانة معينة ولازم نحافظ عليها، وعايز أقول إن المدرب الوطني بيكون له دور وله شكل مميز.
