إبراهيم حسن: محدش في منتخب مصر بيتعامل معاملة خاصة ومحدش بيتدلع ولا إحنا بندادي
تحدث إبراهيم حسن مدير منتخب مصر الأول لكرة القدم عن لاعبي الفراعنة خلال كأس أمم إفريقيا، وذلك في حوار خاص وحصري عبر قنوات أون سبورت مع الإعلامي سيف زاهر.
تصريحات إبراهيم حسن
وقال إبراهيم حسن: حسام من ساعة ما بدأ تدريب عنده صبر كبير، وإنه بيعلّم كل اللاعبين، وبنبهر بـ كدة يعني، والواحد له الشرف إنه يقلّد الجوهري، وحسام مثله الأعلى الجوهري ولكنه بيبتكر شغل خاص بـ حسام وبيبقا عايز يعمل حاجة معينة خاصة به هو، كابتن الجوهري بيحب ينجح وعنده ضمير وإخلاص وحياته كلها كرة قدم، ودي حاجة الحمد لله متواجدة فينا بردو شوية.
وأضاف: الـ4 منتخبات اللي وصلوا نصف نهائي كأس أمم إفريقيا مدربينهم وطنيين ومعنى كدة إن المدرب الوطني ناجح، وحتى الدول الإفريقية المغمورة كانوا كل نجاحاتهم مع المدرب الوطني، وبنين هي أصعب مباراة لعبناها في كأس أمم إفريقيا.
وأفاد إبراهيم حسن في تصريحاته: إمام عاشور لما لعب أول مباراة في كأس أمم إفريقيا وخرج مبكرًا، إمام كان عارف إنه مش هيقدر يلعب المباراة كاملة وحسام حسن شعر بالملعب وعرف إن إمام مش هيقدر يكمّل لأنه لسه راجع من وقت كبير جدًا ملعبش، ولما إمام طلع الناس قالت إمام مش هيلعب تاني، ولكن إمام لعب وتألق.
وأردف: محدش بيتعامل معاملة خاصة ومحدش بيتدلع ولا إحنا بندادي، وكل اللاعبين في المنتخب زي بعض، واللاعيبة اللي مشتغلتش معانا هيفتكروا إننا بنضرب اللاعبين مثلًا ولكن دا مش صح.
وعن الذكريات، قال إبراهيم حسن: كلنا كنا واحد في 1990، والمجموعة كلها كانت واحد، والكل عايز ينجّح المنظومة وعايزين نساعد الكابتن الجوهري وعايزين نفرّح الشعب المصري، ومكنش فيه حاجة اسمها إن اللاعب دا عنده غيرة من دا.
وأتم: حسام هو التوأم بتاعي، وفي بعض المباريات بشوف إن المدافع عاوز يخش يأذي حسام، وفي الوقت اللي بيعملها المدافع لازم أقوله لو عملتها تاني هأذيك فـ هو هيراجع نفسه، ولو أنا مشيلتش حسام ومدافعتش عنه اللاعب هيكررها تاني.
