نورهان: كسرنا التابوهات المجتمعية في مسلسل ورد على فل وياسمين
أعربت الفنانة نورهان عن سعادتها بنجاح مسلسل ورد على فل وياسمين، مشيرةً إلى أنها تتبنى قضايا المسلسل بشكل شخصي، الأمر الذي دفعها للمشاركة به فور قراءة السيناريو.
وقالت نورهان خلال تصريحات لـ القاهرة 24: كلمني المخرج توبة وهما بيصوروا وأنا بعتبره أخويا الصغير واشتغلت معاه في أكتر من عمل وهو مساعد وكنت فرحانة بيه، فوافقت.
وأضافت نورهان: وكلمني المنتج أحمد عبد العزيز ومضينا العقد، ولما قرأت السيناريو عرفت ليه توبة اختارني في الدور بالذات؛ لأن فيه أدوار معينة بتحتاج عشان الجمهور يصدقها تكون الصورة الذهنية عن الممثل متوافقة مع الدور.
وأشارت إلى أن جملة “بشتري أخواتي” كانت مفتاح الشخصية بالنسبة لها ودفعها لقبول الدور، مضيفةً: دي أول جملة حببتني في الدور ولفتت نظري، وكمان حماسي لقصة الحب، وفيه جمل حوارية أيقونية بيني وبين الفنانة سلوى محمد علي، كمان من الحاجات اللي مؤمنة بيها إن الأب والأم أحيانًا بيحققوا أحلامهم في أولادهم ومش بيشوفوا هما عايزين إيه، وكمان أنا من أنصار فكرة إلغاء الفوارق بين الناس اللي بيحبوا بعض بصدق، مفيش في الدين مرجعية ليها، أهم حاجة التقوى والخلق والدين، ولا الدين عمره اتكلم عن فرق الس، سيدنا محمد اتجوز بالأكبر والأصغر منه، ولا عمر الدين كان فيه تمييز لواحدة مطلقة، بالعكس، وأغلب زيجات سيدنا محمد مطلقات.
وأردفت نورهان: أنا حبيت قضية المسلسل، وديه قضيتي في الحياة، وبتضايق جدًا، لما حد يستشعر إن فيه فضل من واحد لما يتجوز واحدة مطلقة، وكان نفسي أكسر التابوهات المجتمعية غير المبررة من خلال المسلسل، مشيرةً إلى أن علاقة إلهام وطارق في مسلسل ورد على فل وياسمين إن كانت موجودة في الحقيقة من الممكن أن يتم استكمالها ولكن إن لم تكن في مجتمعنا.
أبطال مسلسل ورد على فل وياسمين
تعاونت نورهان مع العديد من الفنانين في مسلسل ورد على فل وياسمين، منهم: صبا مبارك، أحمد عبد الوهاب، ميمي جمال، سلوى محمد علي، إسماعيل فرغلي. ياسر عزت، فدوى عابد، وليد فواز، هديل حسن، وردشان مجدي، ندى عادل، إيمان الشريف.
