محمد السيد: بيراميدز أصعب منافس للزمالك.. واتخصملي 200 ألف جنيه بسبب حلاق
قال محمد السيد لاعب نادي الزمالك إن أصعب منافس بالنسبة لفريقه في مصر هو نادي بيراميدز، مؤكدًا في الوقت ذاته أن فيديوهات التشكيك قادت الفريق للتتويج بلقب الدوري.
وأضاف محمد السيد في تصريحات إذاعية: أصعب منافس بيراميدز وكان بيفرق معانا نشوف الفيديوهات اللي بتشكك فينا كانت بتدينا دافع وبنقولهم في الملعب إن إحنا مش كده وإن الزمالك فيه لاعيبة كبيرة وده اللي حصل وفي الآخر أثبتنا إننا لاعيبة كبيرة وتوجنا بلقب الدوري.
وأكد محمد السيد أن فرحته بالتتويج بلقب الدوري غير مسبوقة ولم تحدث من قبل، مؤكدًا في الوقت ذاته أن البطولة جاءت في أصعب وقت للفريق عقب خسارة لقب الكونفدرالية أمام اتحاد العاصمة.
وواصل لاعب خط وسط الزمالك: أول مرة أفرح كده في حياتي بعد صفارة حكم مباراة سيراميكا فرحتي كانت غير مسبوقة محصلتش قبل كده لأننا تعبنا جدا وربنا كلل تعبنا ده بالفوز بلقب الدوري.
وأكمل: الونش قالنا لازم نكسب البطولة تاني يوم الكل كان زعلان الوحيد اللي اتكلم كان الونش قالنا اللي يلعب يشد حيله وده تاريخ هيتكتب ليكوا وقالنا لازم نعوض الجماهير عن الحزن وعدم الفرحة.
وكشف محمد السيد عن العقوبة التي وقعت ضده من جانب عبد الناصر محمد مدير الكرة قائلًا: كابتن عبد الناصر خصم مني 200 ألف جنيه لأني جبت حلاق في يوم مينفعش أجيبه فيه وجبته في غرفة محمد إبراهيم خصم مننا كل واحد 200 ألف جنيه.
فيما تطرق محمد للحديث عن محمد شحاتة وما حدث عقب إهداره ركلة الجزاء في مباراة نهائي الكونفدرالية أمام اتحاد العاصمة قائلًا: طبيعي أي حد يضيع ركلة جزاء ولكن هو كان متأثر وراجل إنه يلعب في الظروف دي ولكن محدش سابه الكل كان معاه وبعد ما الماتش خلص متكلمش مع حد.
