أول تعليق لعامل الدليفري صاحب فيديو الاحتفال بفوز مصر على أستراليا: احتفلت معاهم وسلمت الأوردر لزميلي | خاص
تداول مستخدمو مواقع التواصل الاجتماعي مقطع فيديو لعامل دليفري يحتفل مع عدد من المشجعين بعد فوز منتخب مصر على أستراليا بركلات الترجيح، حيث حمله المشجعون على دراجته النارية في أحد شوارع التجمع الخامس، في مشهد لاقى تفاعلًا وإعجابًا واسعًا عبر منصات التواصل.
أول تعليق لعامل الدليفري صاحب فيديو الاحتفال بفوز مصر على أستراليا
وقال عامل الدليفري، في تصريحات لـ القاهرة 24: كنت معدي بالصدفة ومعايا أوردر رايح أوصله لعميل، وشوفت الناس بتحتفل بفوز مصر على أستراليا بعد ركلات الترجيح، وفجأة لقيتهم اتجمعوا حواليا وفضلوا يسقفوا ويغنوا.
وأضاف: فوجئت بيهم بيرفعوني وأنا على الموتوسيكل، وفضلوا يغنوا، وكنت فرحان من قلبي بسبب حبي لمصر واللي عمله منتخبنا، لما لقيتهم كده سلمت الأوردر اللي معايا لحد من زملائي يوصله عشان ميتأخرش على العميل أو يتبهدل مني.
وتابع: الاحتفال تقريبا استمر حوالي ساعة وأنا سلمت الأوردر لزميلي وكملت معاهم رقص وغناء وكنت مبسوط أوي بفرحتهم بيا واحتفلت معاهم بكلاكس الموتوسكيل، ومكنوش عايزين ينزلوني أبدًا وكنت مبسوط وفرحتي ملهاش حدود، لدرجة إنهم حسسوني إني كنت بلعب معاهم في الماتش وإني أنا اللي جبت الجول مش لاعبي المنتخب.
