حمدي فتحي: أتمنى أختم حياتي في الأهلي.. ولكني أريد الاستمرار بـ الوكرة حتى الاعتزال
تحدث حمدي فتحي، لاعب نادي الوكرة القطري، عن عدد من الملفات الخاصة بالنادي الأهلي، بداية من انتقال أحمد سيد زيزو إلى القلعة الحمراء، مرورًا برحيل محمود حسن تريزيجيه، وصولًا إلى موقفه من تفاوت العقود ومستقبله مع الفريق.
تصريحات حمدي فتحي
وقال حمدي فتحي: كنت عارف من بدري إن زيزو جاي الأهلي وده شيء متوقع، أي لاعب يتمنى يلعب في الأهلي، إنت رايح تلعب كأس العالم للأندية، ودي حاجة هتتكتب في تاريخك، ودي حاجة كبيرة.
وعن إمام عاشور، أوضح: إمام عاشور لاعب كبير ودماغه كبيرة، وممكن كان مش موفق، إنما انتقال زيزو وتريزيجيه مأثرش عليه، بل المفروض يضيفله.
وأضاف: رحيل تريزيجيه هيفرق مع الأهلي، والأداء هيتأثر سلبًا، وتريزيجيه عمل موسم كويس وكان أفضل لاعب في الفريق، وعشان تجيب لاعب زي تريزيجيه هيكون صعب.
وتطرق حمدي فتحي إلى أزمة تفاوت العقود داخل الأندية، قائلًا: ده رزق كل واحد. لو باخد أقل منك، هشتغل عشان أوصل وآخد رقم كبير، مش هتكلم وخلاص. السوشيال ميديا أثرت على الفريق في موضوع الفلوس. كل واحد اتفق مع النادي ياخد رقم، وده رزقه. أنا بشخصيتي مليش علاقة، هركز في شغلي وبس.
وعن مركز الظهير الأيسر، أكد: مفيش ظهير أيسر هيجي الأهلي زي علي معلول، هو لاعب مرعب." وأضاف: "كنت أتمنى عمرو السولية وعلي معلول يلعبوا كأس العالم للأندية مع الأهلي، حتى لو تكريم لهم.
كما تحدث عن الجنوب إفريقي بيتسو موسيماني، قائلًا: موسيماني في المباريات الكبيرة رائع، ولكن مشكلته في الفرق اللي بتدافع وبتقفّل الملعب، وأعتقد إنه مكنش محبوب بسبب تصريحاته في المؤتمر الصحفي وخسارتنا للدوري موسمين على التوالي.
واستعاد حمدي فتحي ذكريات نهائي دوري أبطال إفريقيا أمام الوداد، مؤكدًا: اتظلمنا في مباراة الوداد اللي اتلعبت من ماتش واحد في المغرب في نهائي دوري أبطال إفريقيا، ومينفعش قبلها بشهر تحدد الملعب، وكلنا كنا متعصبين ومتأثرين بسبب الأحداث اللي حصلت.
واختتم تصريحاته بالحديث عن مستقبله، قائلًا: أكيد أتمنى أختم حياتي في الأهلي، ولكن شايف إنه هيبقى صعب، لأني عايز أكمّل في الوكرة القطري لحد الاعتزال.
