حمدي فتحي: بيراميدز فاوضني خلال الموسم الماضي.. وريبيرو كان فاكر التعادل مع إنتر ميامي كويس للأهلي
كشف حمدي فتحي، لاعب نادي الوكرة القطري، كواليس مفاوضات بيراميدز لضمه إلى جانب حديثه عن تجربته مع الأهلي في كأس العالم للأندية 2025، ورأيه في المدرب الإسباني خوسيه ريبيرو، والمدير الفني السابق مارسيل كولر.
تصريحات حمدي فتحي
وقال حمدي فتحي في تصريحات عبر قناة أون سبورت إن نادي بيراميدز تواصل معه ومع إدارة الوكرة خلال الموسم الماضي من أجل التعاقد معه، موضحًا: “السنة الماضية بيراميدز كلمني وكلم الوكرة القطري وكانوا عايزين يتعاقدوا معايا وكانوا مقدريني بصورة حلوة، وفي الوقت ده كنت حابب أرجع مصر، ولكن الوكرة رفض ودلوقتي أنا مبسوط في الوكرة ومكمّل، وهما بيحبوني ويقدروني فأنا مكمل هناك.”
وأضاف أن عودته إلى الأهلي كانت على سبيل الإعارة فقط للمشاركة في كأس العالم للأندية 2025، مؤكدًا: “إعارتي مع الأهلي كانت شهرًا خلال كأس العالم للأندية 2025، وبعدها محصلش كلام رسمي إني أرجع الأهلي تاني، والخطيب هو اللي كلمني عشان الأهلي يتعاقد معايا في كأس العالم للأندية.”
وتحدث لاعب وسط الأهلي السابق عن مشاركة الفريق في البطولة، قائلًا: “مش فاكرين اللي حصل في البطولة، وكنا رايحين هدفنا نحقق شيء جديد لـ اسم الأهلي، ولكن التوفيق مكنش معانا، وتغيير المدرب كمان أثّر، وحسيت إنه مكنش وقته ومكنش حلو، والسيستم اللي كان ريبيرو عايز يطبقه في أهم مباريات في تاريخ النادي أثّر بشكل سلبي على الأهلي.”
وأضاف: “ريبيرو فنيًا مش وحش، وممكن يكون مخدش على ضغوط الأهلي عشان كده لم ينجح، ولازم لما تجيب مدرب تجيب مدرب شخصيته قوية ويليق بالأهلي والوقت مكنش مناسب، وكنت شايف إن عماد النحاس يكمل.”
وواصل: “ريبيرو بعد أول ماتش لما اتعادلنا مع إنتر ميامي كان فاكر إن ده كويس بالنسبة للنادي الأهلي، واتخض من رد فعل الناس.”
وأشاد حمدي فتحي بمدرب الأهلي السابق مارسيل كولر، مؤكدًا: “بحب كولر جدًا وتحت قيادته قدمت أفضل موسم لي في الأهلي، وشخصية قوية وكان بيدينا حريتنا في الملعب، ورغم كده كان لازم اللاعيبه تنفذ طلباته عشان تلعب.”
وأضاف: “كنت أتمنى يستمر داخل الأهلي لفترة طويلة، وكان هو الوحيد اللي مكنش عايزني أمشي، وقالي: مش هقدر أجيب أو ألاقي حد زيك، ولكن أنا اللي أقنعته وشرحتله وجهة نظري، والموضوع في الآخر مشي.”
وكشف حمدي فتحي عن حديثه مع لاعبي الأهلي الحاليين، قائلًا: “بتكلم مع لاعيبة الأهلي في المنتخب، وبقولهم إن ضغط الأهلي مبقاش زي الأول، عشان كده الكرات بقت بتوصل لمرمى الفريق بشكل أسرع، وبيوافقوني في الرأي.”
واختتم تصريحاته بالتأكيد على رفضه الربط بين النتائج والدوافع المادية، قائلًا: “مفيش لاعب بينزل وعايز يخسر مباراة، عشان كده مش مقتنع بنقطة الفلوس، لأن ده طبيعي في الكورة.”
