جدعنة المصريين.. شاب من ذوي الهمم يروي تفاصيل مساعدة صاحب سكوتر له على كورنيش الإسكندرية: وصّلني وهو مايعرفنيش
في مشهد إنساني يجمع ما بين الإنسانية وجدعنة المصريين، ظهر في مقطع فيديو عبر فيسبوك، شاب صاحب سكوتر بكورنيش الإسكندرية يساعد آخر من ذوي الهمم، حيث ظهر وهو يقود سكوترًا ويسحب الكرسي المتحرك الذي يجلس عليه شاب من ذوي الهمم، في لفتة إنسانية أثارت تفاعلًا واسعًا بين مستخدمي مواقع التواصل الاجتماعي.
وروى بلال رمضان، كواليس فيديو سحب صاحب سكوتر له على كورنيش الإسكندرية يساعده في الطريق، حيث قال في تصريحات خاصة لـ القاهرة 24، كنت نازل من الكورس يوم جمعة، في سموحة وماكنش في مواصلات، والميكروباصات اللي كانت بتعدي عليا يا زحمة يا مش بتقف لي عشان الكرسي، ومشيت بالكرسي من سموحة لحد سيدي جابر، ووقفت في الطريق لحد ما ألاقي مواصلات، والشاب اللي ظهر في الفيديو بالسكوتر وقف لي وخدني وراه بالكرسي، قولت له همسك في السكوتر من ورا وهدّي أنت السرعة.
شاب من ذوي الهمم يروي تفاصيل مساعدة صاحب سكوتر له على كورنيش الإسكندرية
وأضاف بلال رمضان: الشاب وصّلني لحد محطة الرمل، وقابلته بعدها بشوية في الشارع تاني كنت أنا لسه واقف وهو بيلف، وعربية خبطته، واطمنت عليه، لكن أنا لا أعرفه ولا يعرفني، كل الناس اللي شافت الفيديو المنتشر على السوشيال ميديا فكرت إننا أصحاب، وأتمنى أوصل أشوفه تاني وأشكره على جدعنته معايا.
وأضاف بلال رمضان، الشاب صاحب السكوتر جدع من جدعان الإسكندرية ونموذج لجدعنة المصريين، ووافق يوصلني في سكته بدون أي سابق معرفة، ومشي بسرعة بطيئة عشان متعورش أو أقع، وفوجئت بالفيديو المنتشر عبر منصات التواصل الاجتماعي، مكنتش أعرف إنه فيه حد بيصورنا.
واختتم: فرحت جدًا بالتعليقات الإيجابية على الفيديو، وردي على التعليقات السلبية إن الناس معاها حق من حيث المخاطر، ولكن أنا بطل رياضي وواخد بطولات في السباحة وبلعب باسكت وشاركت في ماراثون الجري، وبعرف أتعامل مع الكرسي ومع المخاطر.
