شيكو عن صعوبات مسلسل اللعبة: اتأجل عرضه سنتين وقدمنا فيه 150 حلقة
كشف الفنان شيكو تفاصيل وكواليس صناعة مسلسل اللعبة، مشيرًا إلى أنه واجه العديد من العقبات والصعوبات في بدايته، مؤكدًا أن فريق عمل الكتابة أبدع في خلق أفكار جديدة ومختلفة لـ150 حلقة.
صعوبات مسلسل اللعبة
وقال شيكو خلال ندوته في القاهرة 24: اللعبة ده تقريبًا من أحلى الأعمال اللي عملناها في حياتنا، وإحنا بنعمله ما كناش متخيلين إنه هيكمل كل ده خالص، وإحنا بدأنا تصويره 2018، ونزل في 2020، وكان المفروض هينزل في رمضان 2019 وقالوا لنا مش هينزل فما رضيناش نكمل واتضايقنا من المنتج.
وأردف شيكو: بعدين رجعنا كملناه آخر 2019 على إنه هينزل رمضان 2020، جت الكورونا والناس كلها قفلت، ولما منصة شاهد عملت إعادة إطلاق في 2020 فوجئنا من صحابنا بيقولولنا البرومو بتاع اللعبة هايل، فقولتلهم شوفتوه فين؟ قالونا في حفلة شاهد في دبي، ونزل المسلسل في شهر 2 مش في رمضان بردو، واتضايقنا جدًا بردو، لأننا تعبانين فيه وعاملين 30 حلقة وأفكاره غريبة وحلوة، ومعانا نجوم.
وأضاف: بس مسلسل اللعبة صعب، يعني إنك تكتب لـ عشر أبطال دي أصلًا حاجة عجيبة، ودلوقتي لما بنقعد نبص إحنا عاملين اللعبة 150 حلقة، الـ150 حلقة دول لو قسمتهم كده تلاقي فيهم تقريبًا 75 لعبة، 75 تحدي، فدي حاجة كبيرة جدًا مش حاجة صغيرة، وأفكارهم صعبة.
وتابع شيكو: فريق الكتابة كبير منهم خطاب ووالي ومعانا إبراهيم صابر ومعانا Head Writer فادي أبو السعود، وبنقعد أنا وهشام ومعتز التوني معاهم، فإحنا تقريبًا سبعة بنشترك في الأفكار والحاجات، فعلا الموضوع كبير ومرهق جدًا، وكمان كنا مهتمين بالأدوار اللي معانا كلها ومفيش شخصية في اللعبة مش مميزة، يعني حتى لو واقف ساكت في المشهد أنت عارف ده مين، يعني عم سامي ساعات بيبقى عنده جملة واحدة في المشهد، فإحنا قاعدين مستنيين عم سامي يقول الجملة بتاعته، والجملة بتاعته أحلى من المشهد كله.
