اعترافات أحد المتهمين بقتل رجل الأعمال وتقطيع جثمانه بالتجمع: قتلته وروحت محل بلايستيشن| خاص
كشفت التحقيقات تفاصيل اعترافات المتهمين بقتل رجل أعمال داخل أحد الكمبوندات السكنية بمنطقة التجمع في القاهرة، ووضع جثمانه داخل ثلاجة، وذلك انتقامًا بعد علم المتهم الأول وجود علاقة غير شرعية بين شقيقته والمجني عليه ما دفعه إلى الاستعانة بصديقه من أجل إجباره على التوقيع على عقد زواج بينهما، قبل أن تطور الأمور وتنتهي بجريمة قتل.
اعترافات المتهم بقتل رجل الأعمال وتقطيع جثمانه بالتجمع
وبمثول المتهم الثاني أمام جهات التحقيقات المختصة في القضية، وبسؤاله حول ما هي تفصيلات أقواله بشأن الواقعة؟ أجاب: اللي حصل إن محمد صاحبي من زمان ونزلنا يوم العيد اتمشينا ولقيته طلب مني يقابلني تالت يوم العيد على قهوة في الحي العاشر في الشارع الجديدة، ولقيته بيقولي فيه واحد تعدى على واحدة كانت شغاله عنده وإحنا هنروحله عشان نمضيه على عقد الجواز ونخوفه ونرجع تاني.
وواصل: قال شوف كدة هنروحله امتى ونخلص الموضوع ده وقالي ماتخافش مفيش حاجة هتحصل إحنا بس هنمضيه على عقد الجواز وهنمشي، ويوم الجمعة اللي بعد العيد لقيته بيكلمني في التليفون وبيقولي أنت هتجيلي بكرة السبت الساعة 7 الصبح وروحتله فعلا عند بيته يوم السبت الساعة 7 الصبح، واداني عصايتين بيسبول واحدة حديد وواحدة خشب وكان معاه شنطة سوداء قالي إن فيها عدة كاميرات عشان لو حد سألنا هنقوله كدة وأنا قولتله هناخد العصايتين دول ليه هو إحنا رايحين نتخانق قالي عشان لو حصل حاجة نخوفهم بس مش أكتر من كدة فقولتله ماشي.
وأضاف: وبعد كدة ولقيته طلب عربية ومشينا ولقيته ودانا ناحية التجمع الأول ولقيته بيقولي هو المشوار كله نص ساعة وهنروح نمضي الراجل على عقد الجواز وهنرجع على طول، ووصلنا والعربية نزلتنا قدام باب الفيلا وكانت حوالي الساعة 7:30 الصبح ونزلنا ودخلنا الفيلا وطلعنا على الدور الثاني بعد الأرضي، وقبل ما نطلع قال خبط أنت على الباب وأنا هقف من الناحية الشمال علشان ميشوفهوش وطلعنا على الشقة وخبط على الباب مرتين لقيته بيرد عليا من جوه قالي مين قولتله أوردر ولما فتح الباب لقيت محمد رزع الباب برجله ودخل على الراجل وخبطه بعصا البسيبول على راسه.
وأردف: لما لقيته بيزعق وبيقول يا ولاد الكلب روحت ضربته بالعصا الخشب اللي كانت معايا على كتفه اليمين ومحمد راح موقعه على الأرض جنب الحمام واتفاجئت بدم على ايد محمد ولقيت سلاح أبيض في ايد الراجل دا ومحمد خطفه منه وراح طعنه بيه في جنبه وكان صاحي وراح طعنه تاني في كذا حته في جسمه لحد ما الراجل سكت خالص.
وأردف: أول ما شوفت الراجل سكت خالص قولتله إيه يا محمد دا ولقيته بيقولي خلاص امشي أنت فقولتله أنت كده حطيتنا خلاص تفيد بأي أنزل دلوقتي ولقيته فعلا راح بص من البلكونة ولقي فيه واحدة بتمسح عربيات قدام الفيلا فقالى 5 دقايق وامشي عشان في واحدة في الشارع أول ما تمشى هطلبلك عربية وأنا هخلص كل حاجة وفعلا طلبلي عربية وأول ما وصلت بص على الشارع وبص من العين ملقاش حد وقالي أمشي وكنت مكملتش نص ساعة جوه الشقة وكان معايا نضارة شمس سوداء لبستها ونزلت ركبت العربية ومشيت على الدويقة عند بلاى ستيشن عند واحد صاحبي وقعدت مع صاحبى دا لحد الساعة 9:30 الصبح.
واختتم: بعدها روحت على بيتي في المقطم في حي الأسمرات ودخلت البيت ولما روحت كنت خايف وقلقان معرفتش أنام وأخدت برشام منوم علشان مكنتش عارف أنام ولقيت محمد بيتصل بيا حوالي الساعة 9:30 بالليل وقالي تعالى قابلني على القهوة اللي بنقعد عليها في حي العاشر ولقيته حكالي اللي عمله وقالي بعد ما أنت مشيت أنا قطعته نصين.. وقعدت معاه شوية شربنا قهوة وهو مشي وأنا مشيت على الدويقة على البلاى ستيشن وخلصت وروحت البيت الساعة 3:30 الصبح وبعد الفجر اتفاجئت بالحكومة بتخبط علينا ولما فتحت الباب اخدوني على القسم ودا كل اللي حصل.
