المتهم بقتل مسنة شبين الكوم في التحقيقات: الشيطان خلاني أسرقها لكنها فاقت فقتلتها

أحالت جهات التحقيق المتهم بقتل مسنة لسرقتها بمنطقة شبين الكوم للمحاكمة الجنائية، بتهمة القتل العمد، بعدما حاول سرقة المجني عليها أثناء نومها داخل إحدى العشش. 

أقوال المتهم بقتل مسنة شبين الكوم

وقال المتهم بقتل مسنة شبين الكوم في التحقيقات:اللي حصل إن أنا من مركز شبين، وبشتغل في الجبل مزارع، وأنا غلبان وعايش لوحدي، وجيت هنا لناس صحابي في شبين، خرجت معاهم شوية، وخلصت معاهم الخروجة، وقلتلهم إني هروح بيتي في بيتبس تاني. فروحت عند الموقف عشان أركب، ملقتش عربيات هناك، فروحت لفيت من عند مجمع المواقف من ورا، وكنت ماشي، رجلي خدتني كده في أرض فاضية وراكن فيها عربيات، ففضلت ماشي، لقيت واحدة ست نايمة جوه عشة، ففضلت واقف جنب العشة، فالشيطان وزني، بصراحة، إني أدخل أسرق العشة دي، وفضلت واقف جنب العشة شوية، كل شوية أفكر أدخل ولا لأ، بس الشيطان ضحك عليَّ، ولقيت نفسي دخلت العشة، والست كانت نايمة على جنبها.

[[system-code:ad]]

وأضاف المتهم بقتل مسنة شبين الكوم في التحقيقات: الست بدأت تتقلب وحست بيا، فأنا خوفت لتصوت وأتفضح، والناس تيجي تمسكني، فجبت طوبة كبيرة كانت مرمية عند العشة من بره، وضربتها على دماغها بالطوبة، فلقيت مناخيرها بتنزل دم، فخوفت أوي، وجسمي قشعر، فرجعت ورا في العشة، وأنا قاعد خايف، وجسمي عمال يرتعش. أنا أول مرة أعمل حاجة زي كده، وبعدها قومت لقيت موبايلها جنبها، وكان في كيس فلوس طالع من لبسها، فخدت كيس الفلوس والموبايل، وأنا مردتش أصرف الفلوس دي، وهي معايا زي ما هي، وفضلت أمشي في الشوارع لغاية العصر، وبعدها روحت على البيت، فضلت مستخبي لغاية ما الشرطة جت خدتني من البيت.

وأضاف المتهم في أقواله: أنا الحاجات اللي سرقتها عينتها عندي، عشان ده كان وسواس شيطان، وأنا مبعملش الحاجات دي، واديتهم للشرطة لما جت مسكتني، وقلت للشرطي على مكان الطوبة اللي ضربت بيها الست، وجابوها، وأنا غلطان، بس مكنش قصدي إن كل ده يحصل.