طلبوا 10 ملايين جنيه.. ننشر أقوال رئيس قناة الفتح في واقعة اختطافه واحتجازه على يد مجموعة من الأشخاص| خاص
كشفت تحقيقات الجهات المختصة تفاصيل جديدة في واقعة اتهام عدد من الأشخاص باحتجاز أحمد عبده عوض، رئيس قناة الفتح الإسلامية، والاستيلاء على متعلقاته، حيث روى المجني عليه أمام جهات التحقيق تفاصيل الساعات التي قضاها برفقة المتهمين، مؤكدًا أنهم ادعوا انتماءهم لجهات أمنية، واصطحبوه داخل سيارته في مناطق متفرقة بمدينة 6 أكتوبر، قبل أن يساوموه على دفع مبالغ مالية مقابل إنهاء ما زعموا أنها إجراءات أمنية ضده، فيما واجهت النيابة أحد المتهمين بالاتهامات، فأنكرها جملةً وتفصيلًا، مقدمًا رواية مغايرة للواقعة.
وحصل القاهر 24 على تفاصيل التحقيقات في الواقعة والمتهم فيها عدد من الأشخاص بخطف واحتجاز صاحب قناة الفتح الشيخ أحمد عبده عوض.
ننشر نص أقوال رئيس قناة الفتح في واقعة اختطافه واحتجازه على يد مجموعة من الأشخاص
وأمام جهات التحقيق قال أحمد عبده عوض: اللي حصل إني كنت متوجه إلى مقر القناة بالفردوس ومعايا عم أحمد السواق وعم فتحي المساعد بتاعي في عربية القناة وفجأة لقينا عربية ملاكي نيسان جت قفلت علينا ونزل منها 3 أشخاص لابسين ملكي وواحد فيهم معاه لاسلكي وعاملين ضباط وركبوا معانا الميكروباص وخدوا تلفيوناتنا حطوها في التابلوه وفضلوا يقولولنا إحنا مباحث الجيزة وأنت يا أحمد عليك إخبارية وعايزينك.
وأضاف أحمد عبده عوض رئيس قناة الفتح في التحقيقات: وقالوا للسواق اتحرك ورا العربية النيسان وفضلوا ماشيين حبه ورا النيسان واللي عامل فيها ضابط ده بيساومني وطلب مني اتصرف في 10 ملايين جنيه عشان يسيبوني أمشي ويحلولي مشكلتي، وبعدها نزل لـ 5 ملايين جنيه لحد ما وصلوا إنى أدبر مبلغ 150 ألف جنيه مؤقتا لحد ما اتصرف في باقي المبالغ.
وتابع رئس قناة الفتح في أقواله أمام جهات التحقيق: وفي نص السكة وقفوا ونزلوا السواق ركبوه عربية سوداء تانية ومشيت العربية دي والنيسان وواحد من الثلاثة قاد الميكروباص بينا بعدها واللي قاعدين معايا ورا خدوا مني أقلامي وفلاشة عليها شغل وإيصالات تبرعات وبعدها سابونا ومشيوا وسابوا كل حاجة لموها في العربية زي ما هي ما عدا الإيصالات والأفلام خدوها معاهم.
وأكمل أحمد عبده عوض: وبعدها بفترة لقيت الناس في القناة اتصلوا واتقابلوا مع السواق وجابوه وجم عندي مكان ما واقفين وخدونا وطلعنا القسم نعمل بلاغ لأنهم احتجزوني بدون وجه حق وادعوا أنهم ضباط وسرقوا مني حاجتي بالإكراه وفضلوا يلفوا بينا 5 ساعات تقريبا غصب عننا.
وواصل أحمد عبده عوض: والسواق عرفني أنهم ركبوه عربية سمراء مع 3 تانيين ولفوا بيه شوية ونزلواه في حته مقطوعة وحد وقفله ووصله للموقف وأعطاه فلوس يركب بيها ووصل القناة وبعدها بتوع القناة جابوه وجم عليا ورحنا بعدها القسم، والكلام ده حصل يوم 2026/7/23 الساعة 7 صباحا وفضلوا يلفوا بينا 5 ساعات في مناطق كثير في أكتوبر والفردوس.
وأردف: دي ناس معرفهاش أنا شفت منهم 3 بس اللي ركبوا معايا وكان فيه ناس تانية مع السواق في العربية السمراء وواحد كان سايق النيسان الحمراء، وكنا رايحين الشغل في القناة، ومعرفش فيه كاميرات مراقبة ولا لا بس مكانش فيه غيرنا اللي شاف اللي حصل.
وتابع: الطريق كانت واضحة وهاديه لأننا كنا الصبح وكانوا بيلفوا بينا في منقطة زهراء أكتوبر والواحات والفردوس، والحوار مضمونة أنهم عايزني ادفعلهم فلوس وقلتلهم مش معايا مبالغ زي كده ادفعها وفضلوا يماطلوا لحد ما وصلوا المبلغ 150 ألف جنيه، وطلبوا في الأول 10 ملايين جنيه وبعدها 5 ملايين وبعدها وصلنا 150 ألف جنيه وهددوني شفاهة لو ما دفعتش.
