أبوهم مكنش عارف يعمل إيه.. دان آدم زوجة حسام حسن تكشف تفاصيل خناقة الساحل: سحلوني ودلقوا القهوة على وشي

كشفت دان آدم زوجة حسام حسن لـ القاهرة 24 تفاصيل مشاجرة الساحل الشمالي، والتي حدثت منذ قليل.

تفاصيل مشاجرة الساحل

وقالت دان في حديثها لـ القاهرة 24: أنا قاعدة في بورتو مارينا، وكنت رجعت من الحفلة بتاع محمد رمضان، وقعدنا تحت في الأوتيل، فجأة لقيت بناته الصغيرين جايين من اليمين يضربوني في ضهري، وابنه وبنته الكبار جايين من الناحية التانية، وبيشدوا في حسام حسن وبيقوموه.

وأضافت: طليقته ما ظهرتش خالص.. وفجأة مسكوا فنجان القهوة اللي كان سخن، وقلبوه على وشي، وطبعًا نطيت من السخونية وعمالة أصرخ، ومسكوني سحلوني، وبنته الكبيرة مسكتني وسحلتني من شعري وسحبتني من أول الكراسي لغاية الكافيه.

واختتمت زوجة حسام حسن حديثها: أبوهم واقف في وسطنا يا حرام مش عارف يعمل إيه، وهو مش عارف يمسك في عياله ولا يمسك فيا.. وخدت بوكسات وشلاليط، وبعدين سحبوني ودخلوني، ومسكوا في عيالي ضربوهم.. ضربوا العيال الصغيرة اللي هما إخواتهم، بعد كده دخلت جوه قلت ألحقهم، وخدتهم ونزلت بيهم على البحر، واتصلوا بالنجدة، وقالوا لأ مش هنعمل محضر.. محضر إيه؟! حسبي الله ونعم الوكيل.