عمر جابر: خدنا الدوري رغم الظروف.. وكنا نتمنى التتويج ببطولتين لإسعاد الجماهير
أكد عمر جابر، لاعب الفريق الأول لكرة القدم بنادي الزمالك، أن انتماءه للقلعة البيضاء بدأ منذ طفولته، مشددًا على أن علاقته بالنادي وجماهيره تتجاوز كونه لاعبًا داخل الفريق.
عمر جابر: خدنا الدوري رغم الظروف.. وكنا نتمنى التتويج ببطولتين لإسعاد الجماهير
وقال عمر جابر خلال مشاركته في احتفالية التتويج بلقب الدوري الممتاز عن الموسم الماضي بنادي الزمالك: أنا مبسوط إني جوه نادي الزمالك، النادي اللي أنا اتربيت فيه من وأنا عندي 5 سنين، ومبسوط أكتر إني وسط أساطير وجمهور الزمالك العظيم اللي ورانا في الوحشة قبل الحلوة.
وأضاف: كلنا عارفين المشاكل والصعوبات اللي مرينا بيها الموسم اللي فات، لكن الحمد لله بفضل ربنا خدنا الدوري، بفضل لعيبة رجالة وكل واحد كان قريب من الفرقة وقدرنا نحقق حاجة كويسة.
وواصل عمر جابر: كان نفسنا تكون بطولتين في آخر الموسم، لأن جمهورنا يستحق يفرح، لكن ربنا ما أرادش، والحمد لله فرحنا ببطولة الدوري في توقيت مهم جدًا ولجيل مهم جدًا.
وأوضح لاعب الزمالك: قبل ما أكون لعيب في نادي الزمالك أنا مشجع، وعارف كويس الجمهور عامل إيه في الماتشات، والحاجة اللي بأكدها لكم إن اللعيبة بيموتوا نفسهم عشان شعار نادي الزمالك وجمهوره وبيقدموا أقصى ما عندهم.
واختتم عمر جابر رسالته قائلًا: الموسم الجاي صعب علينا، بس إحنا متعودين نحب الصعب، والعلاقة بين الجمهور واللاعيبة هي عيلة.. Family Concept، العيلة أولًا. وطول ما إيدينا في إيد بعض هنعدي أي حاجة، وإن شاء الله نحتفل بكل البطولات مع بعض السنة دي هنا في نادينا.
