شتمتها وقولتلها مش هترتاحي إلا لما أمد إيدي عليكي.. أقوال المتهم الأول في واقعة التعدي على والدته بالسيدة زينب| خاص
كشفت التحقيقات في واقعة اتهام شقيقين بالتعدي على والدتهما بالضرب داخل شقة بمنطقة السيدة زينب، تفاصيل جديدة.
المتهمان بالتعدي على والدتهما بالسيدة زينب
وحصل القاهرة 24، على نص التحقيقات وجاءت أقوال المتهم الأول أمام جهات التحقيق كالتالي:
س: هل أنت معتاد التعدي على والدتك أنت وشقيقك؟
ج: لا خالص، عمري ما ضربتها، بلاغات كيدية.
س: وهل من المتصور عقلًا أن تقوم والدتك بتحرير عدة محاضر قبلك أنت وشقيقك دون قيامكما بالاعتداء عليها؟
ج: لأ، مش منطقي، بس ده اللي حصل.
س: وهل ذلك مبررًا كافيًا لنشوب خلاف فيما بينك وبينها؟
ج: طبعًا، أنا مرضاش أمي تتجوز.
س: ما هي طبيعة وظروف نشأتك الاجتماعية؟
ج: أنا اسمي محمد فرج، أنا أبويا فرج كامل، وده شغال جزار ومات من حوالي 8 سنين، وأمي ربة منزل، وعندي أخويا علي فرج كامل، وأنا دخلت مدرسة الحلمية التجارية واتخرجت منها ومعايا دبلوم تجارة، وبعدين اشتغلت في سوبر ماركت وكنت بكسب كويس، ومع الوقت المصاريف كثرت والمسئولية زادت والدنيا باظت معايا، وقَفلت السوبر ماركت من حوالي سنة، وبعدين من حوالي شهرين اشتغلت في شركة، وسِبتها عشان مرتبها مكنش كويس، وأنا حالتي النفسية من ساعة ما سبت الشغل وهي مش كويسة، ومن الظروف علاقتي بأمي مش أحسن حاجة وهي مش مراعية ده.
س: وما هي طبيعة العلاقة فيما بينك وبين شقيقك المتهم علي فرج كامل؟
ج: ده أخويا الصغير، وعلاقتي بيه زي علاقة أي أخ بأخوه.
س: لمن ملكية الشقة محل النزاع؟
ج: ملكية جدي أبو أمي، وهي وارثاها منه هي وأخواتها
س: وما مدى قيامك بإجبار والدتك المجني عليها لبيع تلك الشقة أو التنازل عنها؟
ج: عمري ما أطلب منها كده.
س: إذًا ما تعليلك لما شهدت به المجني عليها بتحقيقات النيابة العامة من رغبتكما أنت وشقيقك ببيع تلك الشقة؟
ج: محصلش.
س: وهل من ثمة اتفاق بينك وبين شقيقك المتهم بشأن التصرف في هذه الشقة؟
ج: محصلش.
س: إذا، وما هي بادرة تقابلك أنت وشقيقك المتهم سالف الذكر مع المجني عليها حال اقترافكما للواقعة محل التحقيق؟
ج: اللي حصل أنا كنت قاعد متضايق شوية على حالي، أخويا قالها ياما روحي راضي محمد وكلميه شوية عشان هو متضايق.
س: وما التصرف الذي بدر منها آنذاك؟
ج: أمي جاتلي، وبدل ما تراضيني قعدت تبكتني وتقولي: أنت اللي عملت في نفسك كده، قلتلها ياما مش وقتك، وفضلت مكملة، فأنا اتعصبت عليها وقعدنا نزعق.
س: أثناء ذلك، هل قمتما بالتعدي على المجني عليها بالسب؟
ج: بصراحة أنا شتمتها بس من غير قصدي.
س: ما هي الألفاظ أو العبارات التي تفوهت بها في مواجهة والدتك المجني عليها تحديدًا؟
ج: قلتلها بصراحة: كفاية
س: ما سبب ومناسبة توجيه ذلك اللفظ في ذلك التوقيت إليها؟
ج: أنا مكنتش حاسس بنفسي وأنا بقولها من اللي عملته فيا.
س: ما قصدك من نعتها بتلك العبارات الخادشة للاعتبار؟
ج: أنا مكنش قصدي.
س: وما الذي حدث عقب ذلك؟
ج: كملت معاها ورحت قايلها: إنتي مش هترتاحي إلا لما أمد إيدي عليكي، قالتلي تضرب أمك؟ رحت خارج من الأوضة وحوشتها كده.
س: وما كيفية قيامكما بالتعدي على المجني عليها آنذاك؟
ج: إحنا مضربنهاش، أنا زقيتها كده.
س: وهل كان بحوزتك أية أسلحة أو أدوات آنذاك؟
ج: لا.
